10 ноября 2020 г.
Трак енри ял хуçалăх предприятийĕсен тата хресченпе фермер хуçалăхĕсен ертỹçисен вырăна тухса йĕркеленĕ семинар-канашлăвĕ пулса иртнĕ. Ку хутĕнче ăна чикĕллĕ яваплă "Красное Сормово" общество никĕсĕ çинче йĕркеленĕ. Асăннă мероприяти ĕçне район администрацийĕн пуçлăхĕ А. Кузнецов хутшăннă. Паянхи куна асăннă общество Трак енре пур енлĕн аталанса пыракан хуçалăх шутланать. Нумаях пулмасть ĕçе кĕртнĕ фермăра сăвакан 400 ĕне тытаççĕ. Сăмах май, паянхи куна хуçалăхра пĕтĕмпе 1010 пуç мăйракаллă шултра выльăх, 1954 пуç сысна усраççĕ. Предприяти “шурă ылтăн” туса илессипе пирĕн тăрăхра лидерсен шутĕнче пырать. Кăçалхи вунă уйăхра кунта кашни ĕнерен вăтамран 6164 килограмм сĕт суса илнĕ. Ку районăн вăтам кăтартăвĕнчен чылай пысăкрах. Çакă вăл выльăх-чĕрлĕхе аван пăхнипе, ăна ытлăн-çитлĕн тăрантарнипе пулнă. Яманаксем выльăх-чĕрлĕх апачĕ хатĕрлес çĕрте 1623 гектар çĕрпе усă кураççĕ. Хуçалăхра комбикорм ха-тĕрлеме çĕнĕ оборудовани туяннă кăçал. “Красное Сормово” ООО ертỹçи С. Иванов пухăннисене “выльăх-чĕрлĕх хулин” территорийĕ тăрăх экскурси йĕркеленĕ. Кăçал кунта паянхи вăхăт ыйтакан 200 пуç пăру вырнаçмалăх ферма ĕçе кĕртнĕ. Пĕчĕк пăрусене çитĕнме мĕн пур услови туса панă: кашни çамрăк выльăх валли çирĕп, ăшă тытакан полиэтиленран уйрăм пỹрт пур, вентиляци вырнаçтарнă, "кормоняня" лартнă. Вăл вара пăрун апатланăвĕн кун йĕркине çирĕппĕн йĕркелеме май парать, чылай ĕçе çăмăллатать. А. Кузнецов сăмахĕпе, "çакăн пек фермăра пулса курасси — кашни ертỹçĕн ĕмĕчĕ. Паянхи вăхăт ыйтакан çакăн евĕр производствăпа паллашни хăйне май телей, малашлăхри шанăç. Трак енре ку евĕр предприятисем пуррине ырламалли çеç юлать". Трак енри ял хуçалăх предприятийĕсен ертỹçисем вырăна тухса çакăн евĕр канашлусене малашне те йĕркелеме сĕннĕ.