06 ноября 2020 г.
Юпа уйăхĕн 29-30-мĕшĕсенче, Шупашкарта, В.Н. Кочков ячĕллĕ спорт шкулĕнче, республикăри ирĕклĕ майпа кĕрешекенсен ăмăртăвĕ иртрĕ. Унта 2004 — 2006 çулсенче çуралнă хĕр ачасемпе арçын ачасем хутшăнчĕç. Коронавирус чирĕ алхаснă пирки пуш уйăхĕнчен тытăнса ку таранччен тĕрлĕ тупăшусем-турнирсем ирттерменччĕ. Тренировкăсене вара юпа уйăхĕнчен уçă сывлăшра — стадионсенче йĕркеленĕ. Çакă, паллах, кĕрешỹçĕсене чăрмав пулчĕ. Мĕншĕн тесен вĕсен кĕрешỹре тĕрлĕ меслетсемпе усă курса, хирĕç кĕрешекене çурăм çине çавăрса хурса çĕнтерес пулать-çке. Кавирсĕр ун пек тренировкăсем тума май пулмарĕ пирĕн. Çавах та кĕрешỹçĕсем хавхалансах хатĕрленчĕç тĕп хулари ăмăртăва. Район командин чысне хỹтĕлеме çак вĕренекенсем хутшăнчĕç: Ксения Алексеева, Вадим Антонов (Тусай), Вероника Черней (Янмурçин), Екатерина Лысковăпа Августина Михайлова (Именкасси), Наталья Антонова (Çеçмер), Евгений Алексеев (Красноармейски) тата Роман Романов (Кивĕ Йĕкĕт). Шел пулин те, тупăшу умĕн, тĕрлĕ сăлтавсене пула Вадим Антонов, Вероника Черней, Наталья Антонова командăран тухса ỹкрĕç. Ăмăртăва республикăри мĕн пур вăйлă командăсем хутшăнчĕç. Яланхи пекех Вăрнар, Канаш, Шупашкар тата Çĕнĕ Шупашкар кĕрешỹçисем палăрчĕç. Пирĕн спортсменсен çакăн пек кăтартусем пулчĕç: Екатерина Лыскова — 73 кг виçеллĕ категоринче 2-мĕш вырăн, Августина Михайлова — 43 кг — 3-мĕш (иккĕшĕ те — Трак шкулĕнчен). Ксения Алексеева — 4-мĕш пулчĕ. Унăн нумай тантăшĕпе кĕрешме тиврĕ, вĕсен ăсталăхĕ те пысăкрах — нумайăшĕ республика ăмăртăвĕсенче пĕрре мар призлă вырăнсем йышăннă. Арçын ачасене тата йывăртарах пулчĕ — спортсменсем нумай пулчĕç тата ăста кĕрешỹçĕсемпе тупăшрĕç. Çитес турнирсене пирĕн кĕрешỹçĕсем лайăхрах хатĕрленсе çитессе шанас килет.
В. Григорьев.