03 ноября 2020 г.
Иртнĕ кĕçнерникун, юпа уйăхĕн 29-мĕшĕнче, районти Культура çуртĕнче "Творчество ăнăçлăхĕн тĕнчи. Эпир сире валли алăксене яриех уçса хуратпăр!" ятпа пысăк уяв иртрĕ. Çак мероприятипе Трак енри культура ĕçченĕсем хăйсен творчество сезонне уçрĕç. Коронавирус инфекцийĕ анлăн сарăлса пынă май çак каçа йĕркелекенсем сыхлăх правилисене чи малти вырăна кăларчĕç. Уява килнисене çĕнĕ сезон уçăлнă ятпа район администрацийĕн социаллă аталану тата архив ĕçĕн пайĕн пуçлăхĕ Р. Осипова саламларĕ, творчество, искусство ĕçĕнче тăрăшакансене ырлăхпа сывлăх, ăнăçу сунчĕ, куракансене "сире валли кану çурчĕсен алăкĕсем яланах уçă", терĕ. Рена Михайловна юлашки вăхăтра Трак енре культура тытăмĕ çине тимлĕх уйăрнине уйрăммăн палăртрĕ. Акă, районти Культура çуртне тĕпрен юсаса çĕнетнĕ. Халĕ вăл килен-каяна хăй патне илĕртет. Упири кану çуртĕнче юсав ĕçĕсем вĕçленнĕ, палăртнă ĕçсене пурнăçлама тĕрлĕ йышши бюджетран 645 пин тенкĕ уйăрнă. "Устойчивое развитие сельских территорий" программăпа килĕшỹллĕн, кăçал Заволжски клубра тĕпрен юсав ĕçĕсем ирттернĕ, çакна валли 3200 пин тенкĕ тăкакланă. Юсав ĕçĕсем хыççăн Кĕçĕн Шетмĕри кану центрĕ, Пикшикри вулавăш хăйĕн тусĕсене каллех йышăнма пуçларĕç. Халĕ районти тĕп библиотекăра юсав ĕçĕсем пыраççĕ. Район администрацийĕн пуçлăхĕн йышăнăвĕпе Трак енри 5 культура "вучахне" 100-шер пин тенкĕ парса пулăшнă, çакăн евĕр пулăшупах районти Культура çурчĕ 460 пин тенкĕ тăракан çĕнĕ баян туяннă, кунти ветерансен хорĕ валли çĕнĕ костюмсем çĕлеттернĕ. Сцена çине туллă-сăртлă Афганистан çĕршывĕнче интернационалла тивĕçе пурнăçланă салтаксен республикăри Союзĕн районти уйрăмĕн пуçлăхĕ А. Терентьев тата Çурçĕр Кавказри хаяр тытăçусене хутшăннă салтаксен канашĕн районти уйрăмĕн ертỹçи А. Тюмеров улăхрĕç. Вĕсем Трак енсене творчество сезонĕ уçнă ятпа саламларĕç, Красноармейскинче тĕпленнĕ, хăй вăхăтĕнче Çурçĕр Кавказри хаяр тытăçусене хутшăннă Евгений Николаева "Участнику боевых действий на Северном Кавказе" медальпе чысларĕç. Унтан юрă-ташă пуçланчĕ. Коронавирус инфекцийĕ алхаснă май эпир çичĕ уйăх хушши хамăр артистсене сцена çинче курманччĕ, вĕсемшĕн тунсăхланăччĕ. Районти Культура çуртĕнче иртнĕ савăк уявра вара вĕсене алă çупсах саламларăмăр. ЧР культурăн тава тивĕçлĕ ĕçченĕ Н. Никоноров район администрацийĕ уйăрнă укçа-тенкĕпе туяннă çĕнĕ баянпа (вăл нумаях пулмасть Тюмень тăрăхĕнчен килсе çитнĕ) сцена çине тухрĕ, "Огински полонезне" выляса пачĕ, "Вальс ветеранов" юрра мăнаçлăн шăрантарчĕ. Кăçал эпир Тăван çĕршывăн Аслă вăрçинче Çĕнтерỹ тунăранпа 75 çул çитнине паллă турăмăр. Çăмăл килмерĕ тăван халăхăмăра çав Çĕнтерỹ, пысăк инкек тỹсрĕ вăл хаяр та юнлă вăрçăра. В. Николаева вăрçă темипе çырнă сăвă вуларĕ. Раççей шайĕнче иртнĕ "Салют Победы" фестивалĕн гран-прине, Чул хулара пулнă Пĕтĕм Раççейри хорсен фестивальне хутшăнма тивĕçнĕ "Трак ен" халăх фольклор ушкăнĕ (ертỹçи А. Никонорова) Трак станцийĕнче çĕнтерỹçĕсене кĕтсе илнĕ сценкăна кăтартрĕ. Уява пултаруллă ачасем хутшăнни те унăн программине пуянлатрĕ. Катя Никонорова куракансене "Выбирай" юрă парнелерĕ, Кирилл Захаров "Ах, если бы земля умела..." сăвва пултаруллă вуларĕ. Куракансем Николай Яковлевăн икĕ юррине — "Кĕтни" (сăввипе кĕвви Ю. Андреевăн" тата "Юрату хăвачĕ" (сăвви А. Кипечĕн, кĕвви О. Кăйкăрăн) — ăшшăн йышăнчĕç. Ветерансен хорĕ çумĕнчи хĕрарăмсен ушкăнĕ "Ветерансем", Э. Федорова "Пурнăç урапи" юрăсене парнелерĕç. "Хавал" халăх музыкин ансамблĕ "Ан ман мана савниçĕм", "Тăванлăх юрри" юрăсемпе савăнтарчĕ. Малалла пăхсан малаш, тенĕ пĕр сăвăç. Пултарулăх çулĕ культура тытăмĕнче вăй хуракансене яланах малалла чĕнтĕр. Чун таса пулсан кăна пултарулăхра ăнăçу килĕ. Г. Борзин.