Публикации » Атте кунне пирвайхи хут официаллă майпа паллă тунă

03 ноября 2020 г.

 Юпа уйăхĕн юлашки кунĕнче И. Ульянов ячĕллĕ ЧПУн Культура керменĕнче Чăваш Енре пирвайхи хут Атте кунне официаллă майпа паллă тунă. "Паян эпир пирвайхи хут асăннă уява çакăн пек пысăк йышпа республика шайĕнче паллă тăватпăр. "Атте" сăмах питех те хаклă тата кашниншĕнех пĕлтерĕшлĕ. "Анне" сăмахпа пĕрле ачасем "атте" сăмаха та калама тытăнаççĕ. Атте — çемье хỹтĕлевçи, унăн шанчăклăхĕ. Аттен статусне çирĕплетме çак праçнике çирĕплетрĕмĕр те", — тенĕ Чăваш Ен Пуçлăхĕ О. Николаев. Чăваш Енре 2013 çултан Ашшĕсен канашĕ ĕçлет, 2017 çултанпа вăл хăй тĕллĕн ĕçлекен общество организацийĕ. "Эпир паян Аттесен уявне палăртатпăр. Ашшĕсен канашне хĕрарăмсене пула вĕсен общество канашĕ çумĕнче йĕркеленĕ. Çавăншăн вĕсене тав тумалли кăна юлать. Пирĕн тĕллев — çемьери ашшĕн статусне тата пĕлтерĕшне çĕклесси, çавна май çемье пуянлăхне çирĕплетесси", — тенĕ "Чăваш Енри ашшĕсен канашĕ" республикăри общество организацийĕн правлени председателĕ А. Мурыгин. Уявра "ЧР хĕрарăмсен Союзĕ" правлени председателĕ Н. Николаева тухса калаçнă. Праçникре республикăра ашшĕн юхăмне аталантарма пулăшнă ашшĕсене наградăсемпе чысланă.