03 ноября 2020 г.
Чăваш Ен Пуçлăхĕ Олег Николаев Шупашкарти электромеханика колледжĕн базинче “Процессен фабрикисене” ятлă çĕнĕ уйрăма уçма хутшăннă. Палăртнă уйрăма "Ĕç тухăçлăхне ỹстерес тата ĕçпе тивĕçтерес" наци проектне тĕпе хурса пурнăçа кĕртнĕ. Ку — ятарлă вĕренỹ площадки. Кунта çамрăксем тĕрлĕ паха опытсене курса ĕненеççĕ. Наци проекчĕпе ĕçлесе пыракан предприятисем тỹлевсĕр тĕрлĕ пулăшусемпе усă курайраççĕ. Кунти специалистсем Федераци компетенцийĕсен центрĕнче ăс пухса сертификацильлĕ пулнă. Перекетлĕ производствăра паха оборудованисемпе тивĕçтерес, ĕç тухăçлăхне ỹстерес тата продукци туса кăларма вăхăта, укçа-тенкĕ тă- какĕсене пĕчĕклетес ыйтусем çине пысăк тимлĕх уйăраççĕ. Пĕр сăмахпа каласан, Шупашкарти электромеханика колледжĕнче — регионсен пĕлỹлĕх центрĕнче условисем пĕтĕмпех хальхи пурнăçпа килĕшсе тăраççĕ. "Кун пек вĕренỹ тытăмĕ пысăк тĕллевĕн пуçламăшĕ тейĕпĕр. Предприятисемшĕн кун евĕр ĕçе йĕркелени питĕ пĕлтерĕшлĕ. Студентсем, кунта тăрăшакансем пĕтĕм кăмăлтан хăйсен тавра курăмлăхне ỹстерсе пыраççĕ. Преподавательсене хăйсен квалификацине ỹстерсе пыма та аван. Çакăн пек ĕç çĕнĕ варкăш кĕртет аталану юхăмне. Çавăнпа та эпĕ тепĕр хут палăртса каласшăн, çакнашкал уйрăмсене малашне те йĕркелесе яма тăрăшмалла", — тесе каланă хăйĕн сăмахĕнче Чăваш Ен Пуçлăхĕ Олег Николаев. Çавăн пекех паян регион Ертỹçи Шупашкарти "Чăвашкабель" заводне те çитсе килнĕ. Кун пек ĕçлĕ çул çỹревре паян республика Пуçлăхĕ производствăпа тĕплĕн паллашнă, пилотлă проект епле пурнăçа кĕрсе пынипе кăсăкланнă, ĕç тухăçне ỹстермелли программа еплерех пулса пынине курса ĕненнĕ. “Чăвашкабелĕн” генеральнăй директорĕ Игорь Кортунов предприяти пирки тĕплĕнрех каласа кăтартнă, çĕнĕлĕхсем çинчен чарăнса тăнă, паянхи пурнăçпа килĕшсе тăракан условисем пирки ăнлантарса панă пухăннă хăнана. "Кашни цехра тата участокра инженерсемпе тата рабочисемпе мĕнле ĕçсем тумаллине, тухăçа хăш çулсемпе кайса хăпартмаллине хут çине тĕпĕ-йĕрĕпе палăртса ăна 2020 çул пуçламăшĕнче çирĕплетнĕ. Вĕсене коллективсенче темиçе хута та сỹтсе явнă, ку енĕпе ỹсĕм тăвассишĕн кашнин тĕллевĕсене палăртнă. Вĕсене пурнăçа кĕртессишĕн вунă уйăх ĕçлерĕмĕр ĕнтĕ. Производство тухăçĕ хушăнчĕ. Вăл ỹссех пырĕ. Виçĕ çулта ăна 30: таран хăпартма тĕллев лартрăмăр", — пĕлтернĕ Игорь Кортунов. Кулленех ĕç тухăçлăхне ỹстерсе пырассипе тăрăшса вăй хунине асăннă организаци ертỹçи. Олег Николаев регионти ытти предприятисене те çак проектпа ĕçлеме сĕннĕ. Промышленноç аталанăвне çĕнĕ проект чылай витĕм кỹрет. Регионти промышленноç аталанăвĕн фончĕ уйрăмах асăннă ыйтусем çине пысăк тимлĕх уйăрать. Чăваш Республикин Министрсен Кабинечĕ предприятисемпе килĕшсе тухăçлă ĕçлесе пырать. Ỹлĕмрен те çакăн пек пысăк тĕллевсем патне туртăнма чĕнсе каланă хăйĕн сăмахĕнче регион Пуçлăхĕ.