30 октября 2020 г.
Иртнĕ юнкун район центрĕнче “Строителям безмолвных рубежей...” ятлă асăну акцийĕ иртнĕ. Ăна Чăваш Енре Сăр тата Хусан оборона чиккисене тăвакансен ĕç паттăрлăхне халалланă. Историрен çакă паллă: Тăван çĕршывăн Аслă вăрçи пуçлансан тăшман вун-вун хулана питĕ кĕске вăхăтра ярса илнĕ, тĕпрен илсен — оборона линийĕсем çукран. Çакна тĕпе хурса пысăк хуласем тавра окопсем чавма йышăннă. Çĕршывăн Оборона патшалăх комитечĕн 1941 çулхи юпа уйăхĕн 16-мĕшĕнчи хушăвĕпе килĕшỹллĕн Чăваш АССРĕн Халăх комиссарĕсен канашĕ тата ВКП(б) Чăваш обкомĕн бюровĕ пирĕн республикăра Сăр тата Хусан хỹтĕлев чиккисен строительствине тумаллине палăртнă. Унта 17 çултан аслăрах, çирĕп сывлăхлă çынсене явăçтарма сĕннĕ. Çитес çул унтанпа шăпах 80 çул çитет. Сăр тата Хусан чиккисен Чăваш Енри пĕтĕмĕшле тăршшĕ — 380 километр, окоп чавма кунсерен 85 пин çын хутшăннă, тепĕр чухне — 110 пин çын таран. Сăр хĕрринче окоп чавнă май 1942 çулхи кăрлач уйăхĕн 1-мĕшĕ тĕлне 3 миллион кубла метр çĕр кăларнă, дзотпа пемелли 1600 лапам (площадка), 1500 çĕр пỹрт тунă. 2021 çула Чăваш Енре Сăр тата Хусан хỹтĕлев чиккисене тăвакансен ĕç паттăрлăхне халалланă çулталăк тесе пĕлтернĕ. Ку евĕр указа республика ертỹлĕхĕ кăçалхи çу уйăхĕн 9-мĕшĕнче алă пуснă. "Строителям безмолвных рубежей..." асăну акцийĕ шăпах асăннă çулталăкри мероприятисене старт парать. Акци вăхăтĕнче район администрацийĕн социаллă аталану тата архив ĕçĕн сотрудникĕсем, районти культура çурчĕн ĕçченĕсем Трак енре пурăнакансене, унăн хăнисене асăннă хỹтĕлев сооруженийĕсене тăвакансен паттăрлăхĕ çинчен каласа кăтартнă, кашнине ку тĕллевпе кăларнă буклетсене тыттарнă. Г. Борзин.