23 октября 2020 г.
Чăваш Ен Пуçлăхĕ Олег Николаев кашни эрнере пулакан ĕçлĕ планеркăна ирттернĕ. Регион Ертỹçи хăйĕн сăмахĕнче 2021 çула Сăр тата Хусан хỹтĕлев чиккисене чавнă ĕçре паттăрлăх кăтартнă çынсене халалланă çулталăк тесе йышăннине аса илсе хăварнă, кун пирки кăçал указа алă пусса çирĕплетнине палăртнă. Сăр тата Хусан оборона чиккине тунăранпа 80 çул çитет те — республикăра çитес çула çак пулăма халалланă май ăна паллă тăвассипе çыхăннă мероприятисен марафонĕ пуçланать. Çакăн çинчен ĕç тăвакан влаç органĕсен тата муниципалитетсен ертỹçисемпе тунтикунсерен ирттерекен канашлура Алла Салаева вице-премьер пĕлтернĕ. “1941 çулта юпа уйăхĕн 28-мĕшĕнче Сăр тата Хусан оборона линийĕсене тăвассипе курăмлă ĕç пуçланнă. Палăртмалла, унта ытларах хĕрарăмсем, ватăсем, çула çитмен çамрăксем тăрăшнă. Çав йывăр вăхăтра ĕçленĕ паттăрсене хисеплесе, мероприятисен тĕп пайне çỹлерех асăннă кун пуçласан питĕ вырăнлă пулать”, — тесе ăнлантарса панă пуçарăва Олег Николаев. Марафонăн стартне Чăваш патшалăх оперăпа балет театрĕнче йĕркелесе ирттерме плана кĕртнĕ. Унта вунă кунлăх “Пурнăç” ятлă курав йĕркелесе тăратĕç. Ытларах курма килекенсем Тăван çĕршывăн Аслă вăрçин тумхахлă çулĕсемпе паллашма пултарайраççĕ. Тылри паттăрсем пирки те çителĕклĕ хыпарсем хатĕрлĕç. Пĕр сăмахпа каласан, чăваш халăхĕн вăрçăри паттăрла ĕçĕсем пирки хыпарсем анлăн калăпланĕç. Çитес çул Куславкка районĕнче пысăк мемориаллă комплекс хута яма плана кĕртнĕ. Çулталăк вĕçленнĕ тĕле комплекс пуласси никама та иккĕлентермест. “Ку евĕр объектсем республикăри ытти районсенче те пулмалла. Çитĕнекен ăрăва воспитани пама питĕ аван. Тепĕр тесен, туризма аталантарас ĕçе те витĕм кỹрĕ”, — тенĕ республика Пуçлăхĕ. Чăваш Республикин Министрсен Кабинечĕн Председателĕн çумĕ-ял хуçалăх министрĕ Сергей Артамонов хăйĕн докладĕнче регионти уй-хир ĕçĕсем пирки каласа кăтартнă, пĕтĕмĕшле тухăçа туллин пухса кĕртнĕ тесе хыпарланă. Кăтарту япăх мар, пĕлтĕрхинчен чылай пысăк — 19 процент нумайрах. Пухса кĕртмелли купăста, çавăн пекех сахăр кăшманĕ, хĕвел çаврăнăш, рапс кăна кăшт юлнă. Республика кăçал пỹлмесене 954,8 пин тонна тĕш тырă хывнă — 1992 çулхи рекорда (ун чухне кăтарту миллион тоннăран иртнĕ) кăшт кăна çитеймен. Министр ял çыннисем кăçал выльăх апачĕ хатĕрлес енĕпе те ăнăçлă ĕçленине палăртнă. Аграрисем техникăна çĕнетсе пыни савăнтарать — ку енĕпе патшалăх пулăшнин витĕмĕ куç кĕрет. Шалу пирки те сăмах пулчĕ — вăл пысăкланса пырать. Республикăн адреслă инвестици программине мĕнле пурнăçланипе экономика аталанăвĕн министрĕ Дмитрий Краснов паллаштарнă. Программăра чылай объект — çынсене авари пулма пултаракан çуртсенчен куçарассинчен тытăнса садиксем тăвасси таран. Çулталăк вĕçленнĕ тĕле тата виçĕ культура çуртне хута яма плана кĕртнĕ. Спорт объекчĕсем ỹсĕç, ытти ĕçсем те пурнăçа кĕресси никама та иккĕлентермест.