02 октября 2020 г.
Ĕçпе вăрçă ветеранĕсен (пенсионерсен) районти канашĕн президиумĕн черетлĕ ларăвĕ пулчĕ. Унта Тăван çĕршывăн Аслă вăрçинче Çĕнтерỹ тунăранпа 75 çул çитнине халалласа ирттернĕ “Ветерансен канашĕн тăрăшуллă председателĕ” районти виççĕмĕш конкурсăн кăтартăвĕсене пĕтĕмлетрĕç. Çỹлерех асăннă комисси председателĕ С. Мефодьева та, президиум членĕсем те ку конкурса тăратнă ĕçсем пирки хăйсен шухăшĕсене пĕл-терчĕç. Çапла вара пĕрремĕш вырăнсене — Карайпа Янмурçин тăрăхĕсенчи ветерансен канашĕсен председателĕсем Г.И. Егоровăпа Ю.К. Леонидова, иккĕмĕшне — Еншик Чуллăри, районти шалти ĕçсен пайĕнчи тата Янкасри организацисен ертỹçисем Н.Ф. Петрова, В.П. Михайлов, Е.П. Васильева, виççĕмĕшне Мăн Шетмĕри, райпори, Чатукассинчи, редакцири канашсен председателĕсем Э.Г. Филиппов, Л.В. Соколова, Ф.Г. Илларионова тата М.С. Романова тивĕçрĕç. Вĕсене Дипломсемпе тата парнесемпе чыслаççĕ, икшер кедр йывăçĕ парнелеççĕ. Ларура çавăн пекех ĕçпе вăрçă ветеранĕсен (пенсионерсен) районти канашĕн председателĕ Г. Ефимов та тухса каларĕ. Георгий Леонидович иртнĕ тапхăрта тунă ĕçсем пирки кĕскен чарăнса тăчĕ, вырăнсенче тирпей-илем ыйтăвĕсемпе ытларах вăй хумаллине палăртрĕ, юпа уйăхĕнче Пикшик тăрăхĕнчи ветерансен ĕçĕ-хĕлĕпе паллашма палăртнине асăнчĕ. Ларура кунпа пĕрлех ĕçпе вăрçă ветеранĕсен (пенсионерсен) республикăри канашĕн Хисеп хăми çине Карайри ĕçпе вăрçă ветеранĕсен канашĕн председательне Галина Ивановна Егоровăна кĕртме сĕнчĕç. В. Данилов.