Публикации » Космонавтăн амăшĕ

11 сентября 2020 г.

 Совет Союзĕн икĕ хут Геройĕн Андриян Николаев космонавтăн пурнăçĕнче амăшĕ Анна Алексеевна питĕ пысăк вырăн йышăннă. Тăван çĕршыва курма килсен вăл яланах унпа юнашар пынă. Хăй те ывăлĕ патĕнче хăнара темиçе хут та пулнă. Амăшĕ чирлесен те Андриян Григорьевич унран пăрăнман. Амăшĕпе ывăлĕ пĕр кунра — авăн уйăхĕн 5-мĕшĕнче çуралнă. Анна Николаева (1900—1987) Сĕнтĕрвăрри районĕнчи Шуршăлта кун çути курнă. 1913 çулта ялти тăватă класлă шкултан вĕренсе тухсанах ĕçе кỹлĕннĕ. 1930 çулта колхоза кĕнĕ, хуçалăха çĕклес тата аталантарас тĕллевпе вăй-халне шеллемен. Вăл 16 çул икĕ ĕçре — ĕне сăваканра тата лаша пăхаканра — вăй хурса хастарлăх кăтартнă. Анна Алексеевна 4 ачана пĕчченех ура çине тăратнă. Тивĕçлĕ канăва тухсан та вăл ахаль ларман. Çамрăксемпе тĕл пулнă, ĕç коллективĕсене çитсе курнă. 1985 çулта ăна ЧАССР Ĕç Мухтавĕпе Паттăрлăхăн Хисеп кĕнекине кĕртнĕ. Вăл ЧАССР Аслă Канашĕн президиумĕн Хисеп грамотине, тĕрлĕ медале тивĕçнĕ.