Публикации » Шкулсенче Паттăрлăх урокĕсем иртрĕç

11 сентября 2020 г.

 Авăн уйăхĕн 1-мĕшĕнче, Пĕлỹ кунне паллă тунă май, Трак енри шкулсенче Паттăрлăх урокĕсем иртрĕç. Вĕсенче Сăр тата Хусан оборона чиккисене тăвакансен ĕç паттăрлăхне кăтартса “История Сурского рубежа” темăпа презентаци пулчĕ. 2021 çулта Сăр тата Хусан оборона чиккисене тума пуçланăранпа 80 çул çитет. Çавна май ЧР Пуçлăхĕн тивĕçĕсене вăхăтлăх пурнăçлакан О. Николаев çитес çула Чăваш Енре Сăр тата Хусан оборона чиккисене тăвакансен ĕç паттăрлăхне халалланă çулталăк тесе пĕлтернĕ. Сăр оборона чикки — Чăваш тата Мордва АССРĕсен территорийĕсенче Сăр юхан шывĕ тăрăх тунă оборона укрепленийĕсем. Вĕсене, Хусан оборона чиккийĕсем евĕрех, гитлер эшкерĕсем Хусан хули патне ан çывхарччăр тесе тунă. Чăваш АССР территорийĕнче Сăр оборона чикки Сăр юхан шывĕ тăрăх Етĕрне районĕнчи Засурски — Хĕрлĕ Чутай районĕнчи Пантьăк — Улатăр районĕнчи Сурски Майдан — Улатăр хули — Чĕмпĕр облаçĕн чикки таран тăсăлнă. Ăна тума Чăваш Енти вун-вун пин çын хутшăннă, тĕллеве 45 кун хушшинче пурнăçланă. С. Самсонов.