Публикации » Вырма ĕçĕсем вĕçленсе пыраççĕ

08 сентября 2020 г.

Район администрацийĕн агропромышленность комплексĕн организацийĕсемпе çыхăну тытас тата экологи секторĕн оперативлă кăтартăвĕсем тăрăх авăн уйăхĕн пуçламăшĕ тĕлне Трак енри ял хуçалăх организацийĕсенче тата хресченпе фермер хуçалăхĕсенче пĕрчĕллĕ тата пăрçа йышши культурăсене 11 пин гектар ытла (70 ытла процент) пухса кĕртнĕ. Çак тапхăрта 36857 тонна тĕш тырă çапса илнĕ, вăтам тухăç 34,4 центнерпа танлашать. Уй-хирте 48 комбайн ĕçлет. Паянхи куна 14 ял хуçалăх предприятийĕ вырмана вĕçленĕ. Çавăн пекех хуçалăхсенче çитес çулхи тухăçшăн та тимлеççĕ. Кĕрхи культурăсем акма 3182 гектар çĕр хатĕрленĕ, 1695 гектар (палăртнин 37 проценчĕ) акнă. Уй-хир ĕçĕсем малалла пыраççĕ. Ĕçченсем уяр çанталăкăн кашни минучĕпе туллин усă курма тăрăшаççĕ.