04 сентября 2020 г.
ЧР Общество палати, ЧР Тĕп суйлав комиссийĕ, суйлавăн общество сăнавĕн штабĕ авăн уйăхĕнчи суйлав вăхăтĕнче сăнава йĕркелес енĕпе пĕрле çыхăнса ĕçлесси пирки калакан килĕшĕве алă пуснă. Унăн тĕп тĕллевĕ — суйлава май килнĕ таран уççăнрах, тỹрĕрех ирттересси. Унсăр пуçне общество сăнавĕн штабĕ, Тĕп суйлав комиссийĕ тата республикăри коммерципе çыхăнман организацисем те пĕрле ĕçлесси пирки калакан çакнашкал килĕшĕвех алă пуснă. Аса илтеретпĕр: общество сăнавĕн штабне Чăваш Енри Общество палатин никĕсĕ çинче çурла уйăхĕн 18-мĕшĕнче йĕркеленĕ. “Эпир суйлав вăхăтĕнчи сăнава май килнĕ таран анлăрах йĕркелесшĕн. Кăмăл пуррисене пурне те штаба йыхравлатпăр”, — тенĕ суйлавăн общество сăнавĕн штабĕн ертỹçи Дмитрий Донсков. “Общество сăнавĕн штабне туса хуни суйлав процесне ирттерес ĕçе çĕнĕ шая кăларать. Паян çак механизм пирĕн республикăра çĕнĕ, пахалăхлăрах, шая тухать. Эпир паян Чăваш Енри комммерципе çыхăнман 7 организаципе килĕшĕве алă пусрăмăр, çапла общество сăнавĕн штабне туса хунине юридици тĕлĕшĕнчен çирĕплетрĕмĕр. Çак организацисем пурте общество сăнавне пурнăçлама хăйсен представителĕсене явăçтарĕç. Штаб йышне ытти организаци те кĕрессе шанатпăр”, — палăртнă ЧР Тĕп суйлав комиссийĕн председателĕ А. Цветков. ЧР Общество палатин председателĕ А. Судленков суйлавăн общество сăнавĕн штабĕн пĕлтерĕшне пысăк тесе пĕлтернĕ. “Пирĕн суйлав мĕнле иртнине хастар тĕрĕслесе Раççейĕн ытти регионĕшĕн ырă тĕслĕх пулса тăмалла”, — тенĕ вăл. Коммерципе çыхăнман организацисемпе килĕшỹ тăвас тата алă пусас ĕç малалла пырать.