28 августа 2020 г.
Ырă йăлана малалла тăсса, Пĕлỹ кунĕ умĕн пĕтĕм çĕршывĕпех, çав шутра Трак енре те, “Ачана шкула хатĕрле” ыр кăмăллăх акцийĕ старт илчĕ. Вăл 10 çул ытла ĕнтĕ “Единая Россия” политика партийĕн сĕнĕвĕпе йĕркеленет. Уяв умĕн асăннă партин вырăнти ĕç тăвакан комитечĕ, район пуçлăхĕ, район депутачĕсен Пухăвĕн председателĕ В. Петров, Кĕçĕн Шетмĕ ял тăрăхĕн ертỹçи, партин “Яманакское” уйрăмĕн секретарĕ Г. Ефимова Кĕçĕн Шетмĕри нумай ачаллă Козловсен çемйинче пулнă, вĕсене çывхаракан Пĕлỹ кунĕ ячĕпе саламланă. Ирина Николаевна 5 ачана пĕлỹпе воспитани парса ỹстерет: вĕсенчен иккĕшĕ студентсем: асли, Анастасия, И. Ульянов ячĕллĕ ЧПУн 4-мĕш курсĕнче вĕренет, аслă шкулăн профкомĕнче ĕçлет, Катя асăннă университетăн 1-мĕш курсĕнче пĕлỹ илме тытăнать. Диана Кĕçĕн Шетмĕ шкулĕн 6-мĕш класĕнче вĕренет. Даниилпа (6 çул) Денис (5-ре) “Родничок” ясли-сада çỹреççĕ. Ачасем олимпиадăсене, ăс-хакăл конкурсĕсене, тĕрлĕрен тупăшусене активлăн хутшăнаççĕ, малти вырăнсене йышăнаççĕ. Пушă вăхăтра вара амăшне туллин пулăшу кỹреççĕ, килти хуçалăхра 4 ĕне, пăрусем, чăх-чĕп тытаççĕ. Ачасем Валерий Иванович сĕннĕ парнесемпе питех те кăмăллă юлнă.