25 августа 2020 г.
Чăваш Енĕн Обществăлла палати суйлав ĕçĕ-хĕлне пĕлсе тăрас тĕллевпе обществăлла сăнав штабĕ туса хума йышăннă. Çакна палата канашĕн ларăвĕнче унăн членĕсем пĕр саслă пулса йышăннă. Палата председателĕ А. Судленков пĕлтернĕ тăрăх, ЧР Пуçлăхĕн тивĕçĕсене вăхăтлăх пурнăçлакан О. Николаев авăн уйăхĕнче иртекен суйлавра сăнавçăсем валли координацилекен çакăн йышши центр йĕркелеме сĕнỹпе тухнă. Обществăлла палата çак сĕнĕве ырланă, вăл çакăн йышши центрăн йĕркелỹçи пулма хатĕр тата ăна суйлав ĕç-хĕлне пĕлсе тăрас тĕллевпе обществăлла сăнав штабĕ ят пама сĕнет. “Паянтан эпир Штаб йĕркелес тĕлĕшпе мĕн пур интереслĕ енсемпе ĕçе тытăнатпăр”, — тенĕ вăл. Палата членĕсем çакна палăртаççĕ: Штаба йĕркелес сĕнỹпе Обществăлла палатăна кĕрекен организацисем çеç мар, ЧР Пуçлăхне суйлама тăратнă кандидатсем, вĕсен политика партийĕсем те хăйсен шухăш-кăмăлне пĕлтерĕç. Пĕр сăмахпа, Штаба интересленекен пур енсем те, вăйсем те кĕме пултараççĕ. Обществăлла палата членĕсем çакна шанаççĕ: Штаба иртнĕ суйлавсене хутшăннă, уйрăм опыт пуррисем кĕме пултараççĕ. Вĕсен йышĕ пысăк пулни палăртнă ĕçсене уççăн тата анлăн тума май парать. Штаб суйлав пирки информаци пухас тата ăна салатас тĕлĕшпе кăна ĕçлемĕ, вăл çитес суйлавра сăнавçă пулас текенсене вĕрентес тĕлĕшпе тăрăшĕ, урăхла каласан, вĕсене пур енлĕн, тулли пĕлỹпе тивĕçтерĕ. Штабăн тĕп задачи — суйлав кăтартăвĕсене тĕрĕс мар, улăштарса кăтартассинчен хăтăласси. Сăнавçăсем Чăваш Енти мĕн пур суйлав участокĕсенче ĕçлĕç. “Пĕр участока икĕ сăнавçăпа тивĕçтерме пăхатпăр, вĕсен икĕ сменăпа тăрăшма тивĕ. Çавна май эпир 2 пин ытла сăнавçă хатĕрлеме шутлатпăр”, — палăртнă А. Судленков. “Асăннă Штаба Чăваш Республикинче пурăнакансен интересĕсемшĕн йĕркеленĕ, унта вара сасăлав процесĕ уççăн пулса иртессе шанатпăр. Чăваш Республикинче авăн уйăхĕн 13-мĕшĕнчи суйлав йĕркеллĕ, пĕр кăлтăксăр иртнине кашниех ĕнентĕр, сасăлавра Чăваш Енти суйлавçăсен ытларах сассине пухса çĕнтернĕ çын пирки иккĕленỹ ан çуралтăр”, — тенĕ вăл малалла. Обществăлла палатăн пĕрремĕш çумĕ А. Ухтияров Штаб интересленекен мĕн пур енсене сăнаса тăма пĕр пек майсем туса парасси пирки пĕлтернĕ. Штаб суйлавсен тасалăхне тата пахалăхне ỹстерет. Пирвайхи хут сасăлав виçĕ куна пырать. Чăваш Ен Пуçлăхĕн пуканĕшĕн пилĕк кандидат кĕрешет.