Публикации » Тĕп ыйтусене тишкернĕ

18 августа 2020 г.

Иртнĕ кĕçнерникун Трак енре ĕçлĕ çул çỹревпе ЧР çут çанталăк ресурсĕсен тата экологи министрĕн тивĕçĕсене пурнăçлакан А. Воробьев пулнă. Александр Юрьевича район администрацийĕн пуçлăхĕ А. Кузнецов йышăннă, Трак енсене хумхантаракан ыйтусемпе паллаштарнă. Александр Николаевич, тĕпрен илсен, районти тасатмалли сооруженисене юсаса çĕнетес ыйтăва çĕкленĕ. Райцентрти çак сооружение 1986 çулта туса пĕтерсе хута янă, унтанпа ун патне юсавçăсен алли вуçех пырса тĕкĕнмен. Асăннă объект кивелсе çитнĕ, вăл хăй тивĕçне туллин пурнăçлаймасть. Çавăнпа ку ыйту Трак енре çивĕч тăрать. “Реконструкция биологических очистных сооружений КОС-1400 со сливной станцией в с. Красноармейское” объектăн проектпа смета документацине хатĕрлеме Чăваш Республикин Строительство министерствин “Пĕрлехи заказчикăн республикăри служби” КУне панă. Тĕл пулура çавăн пекех районти хытă каяшсен полигонне “Таса çĕршыв” регион проекчĕпе тата “Экологи” наци проекчĕпе килĕшỹллĕн рекультиваци тăвас ыйтăва çĕкленĕ. Каярах А. Воробьевпа А. Кузнецов район администрацийĕнче тăрăшакансемпе тата ял тăрăхĕсен пуçлăхĕсемпе тĕл пулнă. Унта Чăваш Енĕн 2020-2025 çулсенчи социаллă пурнăçпа экономика аталанăвĕн Комплекслă программине тишкернĕ. Юлашкинчен Александр Юрьевич пухăннисен ыйтăвĕсем çине хуравланă.