14 августа 2020 г.
Трак тăрăхĕнче çулленех ялсене тирпей-илем кĕртес, территорисенчи социаллă сфера учрежденийĕсем тавра йывăç-тĕм, чечексем лартас тĕлĕшпе смотр-конкурс йĕркелеççĕ. Район администрацийĕн пуçлăхĕ патĕнче тунтикунсерен йĕркелекен канашлура кăçалхи тупăшăвăн кăтартăвĕсене пĕтĕмлетнĕ. Унта райцентрти “Чебурашка” ача сачĕ çĕнтернĕ. Ăна I степеньлĕ Дипломпа чысланă, 20 пин тенкĕ укçа парса хавхалантарнă. Иккĕмĕш вырăнта — Кĕçĕн Шетмĕри пĕтĕмĕшле пĕлỹ паракан тĕп шкул (II степеньлĕ Диплом тата 10 пин тенкĕ). Упи вăтам шкулĕн çул çитменнисен ушкăнне виççĕмĕш вырăн панă (III степеньлĕ Диплом тата 5 пин тенкĕ). Канашлура çавăн пекех Трак енри ял тăрăхĕсенче, Красноармейски ялĕнче çулсем тăвас тата вĕсене юсас, çуртсен территорийĕсене тирпей-илем кĕртме проектпа смета документацийĕсем хатĕрлес, пĕлỹ учрежденийĕсене 2020-2021 вĕренỹ çулне хатĕрлесе çитерес, ытти ыйтусене пăхса тухнă. Пирĕн тăрăхра та, Чăваш Енри ытти районсенчи пек, шыв башнисене реконструкцилес ĕç пырать. Александр Николаевич палăртнă тăрăх, Трак енри 22 шыв башнинчен 19-шĕ экспертиза витĕр тухнă. Вăл райадминистраци çумĕнчи хуçалăх ушкăнне райцентрти Чапаев урамĕнче шăтăк-путăка юсаса тухма хушнă. Канашлура паянхи кунпа çыхăннă ытти çивĕч ыйтусене те пăхса тухнă.