14 августа 2020 г.
Чăваш Ен Пуçлăхĕн тивĕçĕсене вăхăтлăх пурнăçлакан О. Николаев регион Правительствин черетлĕ ларăвне ирттернĕ. Ларура 2020 çулхи пĕрремĕш çур çулта бюджета еплерех пурнăçланине пăхса тухнă. Ку ыйтупа ЧР Министрсен Кабинечĕн Председателĕн пĕрремĕш çумĕ-финанс министрĕ М. Ноздряков сăмах илнĕ. Вăл палăртнă тăрăх, çур çул кăтартăвĕсемпе бюджетăн тупăш пайне 30375,9 млн тенкĕлĕх пурнăçланă, ку вăл, пĕлтĕрхи çав тапхăртипе танлаштарсан, 14,6 процент ỹснĕ. Тăкаксене 26023,1 млн тенкĕлĕх пурнăçланă, е пĕлтĕрхи çав тапхăртипе танлаштарсан, ỹсĕм — 21,1 процент. Правительство хăй çине илнĕ тĕллевсене пĕтĕмпех пурнăçлать. Чи пысăк хисеп укçа-тенке социаллă политика, вĕренỹ, сывлăха сыхлас тытăм, наци экономики çине янă. О. Николаев ытларах наци проекчĕсем çине тимлĕх уйăрмаллине палăртнă. Ларура Чăваш Енре пурăнма чи сахалтан та кирлĕ укçа виçине хăпартас ыйтăва пăхса тухнă. Ку ыйтупа ЧР ĕç тата социаллă хỹтлĕх министрĕ А. Елизарова сăмах илнĕ. Вăл палăртнă тăрăх, иккĕмĕш кварталта çак виçе 5,1 процент хăпарнă, 9763 тенке çитнĕ. "Çапла май социаллă-демографи ушкăнĕсемпе кăçалхи иккĕмĕш кварталта пурăнма чи сахалтан та кирлĕ укçа виçи ĕçлекенсемшĕн 10361 тенкĕ, пенсионерсемшĕн — 7939, ачасемшĕн 9851 тенкĕ пулнă”, — тенĕ вăл. Ларура “Земство учителĕ” федераци программипе аякри пĕчĕк ялсене ĕçлеме каякан учительсене 1 млн тенкĕ тỹлев парас ыйтăва тишкернĕ.