Публикации » А. Кузнецов Трак енри строительство ĕçĕсемпе паллашнă

14 августа 2020 г.

Район администрацийĕн пуçлăхĕ А. Кузнецов Трак енри строительство тата юсав ĕçĕсемпе паллашнă. ЧР Сывлăх сыхлавĕн министерствин “Васкавлă медицина пулăшăвĕ” БУн “Красноармейски районĕн тĕп больници” филиалĕнче тĕп юсав ĕçĕсем ирттернĕ хыççăн ача-пăча уйрăмĕ уçăлнă. Паян Трак енĕн тĕп сыватмăшĕн территорине тирпей-илем кĕртес ĕç пырать. Çакна валли тĕрлĕ бюджетсенчен 17 млн яхăн укçа уйăрнă. Строительсем халĕ бордюрсем вырнаçтараççĕ, кĕçех территорие асфальт сарĕç. Служба автомашинисене тăратмалли вырăн асфальтпа витĕннĕ. Территорие çутăпа тивĕçтерме пăхаççĕ. Александр Николаевич ПЧ-32-ĕн ертỹçипе М. Арсентьевпа тата “Краснополье” ОООн директор çумĕпе В. Кузнецовпа тĕл пулнă. Вĕсем пушар чаçĕн çывăхĕнче парковка тăвас ыйтăва тишкернĕ. Ăна хăйсен вăйĕпетумалла. Строительство материалĕсемпе район администрацийĕ пулăшать. Красноармейски ялĕн тĕп стадионĕнче те хĕрỹ ĕçсем пыраççĕ. Строительсем искусственнăй виткĕчлĕ футбол уйне, ытти спорт секторĕсене вăхăтра ĕçе ярассишĕн тимлеççĕ. Паян вĕсем дренаж тытăмне вырнаçтарас тĕлĕшпе вăй хураççĕ.