11 августа 2020 г.
Район хыпарçи хăйĕн тусĕсене тĕнчере, Раççейре, респукбликăра, Трак енре пулса иртекен ырă пулăмсене çитерме яланах хатĕр. Акă, райхаçатра “М. Челышов ячĕллĕ орден кавалерĕ” тĕрленчĕк пичетленсе тухнăранпа вăхăт нумаях иртмерĕ-ха. Унта Сочи хулинче собриологин, профилактикăн тата алкогологин “Çамрăксем хушшинче урă пурнăç йĕркине тытса пырассине йĕркелеттерес тата вĕсен сывлăхне çирĕплетес” ятпа Пĕтĕм тĕнчери XXV форум иртнĕ. Унăн ĕçне Чăваш Ен делегацийĕ те хутшăннă. Çав йышра пирĕн ентеш, республикăри наркологи диспансерĕн медицинăпа социаллă реабилитацин пай заведующийĕ А.П. Андреева та пулнă. Чылай ĕçшĕн Алевтина Петровна Пĕтĕм тĕнчери урăлăх академийĕн (академия трезвости) — урăлăх Апостолĕн пысăк наградине — М.Д. Челышов ячĕллĕ ордена — тивĕçнĕ. Ăна вырăнсенче урă пурнăç йĕркин юхăмне анлă сарнăшăн параççĕ. А.П. Андреева (Елакова) Чатукасси тăрăхĕнчи Енĕшкасси ялĕнче ỹссе çитĕннĕ. Амăшне хывнă, çаран чечекĕ евĕр илемлĕ сăн-питлĕ тăванăмăрпа канашласа ларма кăмăллă эпĕ. — Аттепе анне пире, тăватă хĕрне, кун-çул парнелерĕç пулин те, мăнукĕсемпе савăнса кураймарĕç. Хаклă аннеçĕм пирĕнтен питех те çамрăклах уйрăлса кайрĕ, 1975 çулхи раштавра çĕре кĕчĕ, çурма тăлăх хăварчĕ. Эпĕ, 15 çулхи хĕр ача, асли пулнăран, анне вырăнне юлтăм. Алевтина Чатукасси вăтам шкулне лайăх паллăсемпе вĕренсе тухнă хыççăн И. Ульянов ячĕллĕ Чăваш патшалăх университечĕн медицина факультетне вĕренме кĕрет. 1985 çулта асăннă аслă шкултан тухтăр профессине илсе тухать. Çавăнтанпа 35 çул хушши республикăри наркологи диспансерĕнче вăй хурать. Алевтина Петровна малтанах участокри врач-наркологра, ун хыççăн диспансер уйрăмĕн заведующийĕнче, республикăри наркологи диспансерĕн тĕп врачĕнче тимленĕ. Халĕ вара республикăри наркологи диспансерĕн медицинăпа социаллă реабилитацин пай заведующийĕнче вăй хурать. Обществăлла ĕçсене те чун-чĕре ыйтнă пек хутшăнать. — Эпир сывă пурнăç йĕркине тытса пырас, эрех-сăрана хирĕç кĕрешес çĕрте нумай çул “Эпир сывă пурнăç йăли-йĕркишĕн” программăпа ĕçлетпĕр. Темиçе çул каялла Пĕтĕм Раççейри “Амăшĕсем наркотиксене хирĕç” обществăлла организацин учредительнăй съездне хутшăнтăм. Вăл Мускав хулинче иртрĕ, — ăшшăн канашлать манпа А. Андреева. Асăмра юлнă тепĕр саманчĕ вăл, паллах, Сочи хулинчи пысăк форума хутшăнни, Пĕтĕм тĕнчери урăлăх академийĕн чи пысăк наградине тивĕçни. “Чăваш Енри наркологи службине — 80 çул” юбилей медальне, РФ тата ЧР Сывлăх сыхлав министерствисен Хисеп хучĕсене илме тивĕçни те. Кăçал вара, 2020 çул, пирĕн туслă çемьене пысăк савăнăç килсе çитрĕ, — хавхалануллă кăмăлпа, ăш пиллĕн сăмахлать тăванăмăр. Халĕ вара Алевтина Петровна “Чăваш Республикин тава тивĕçлĕ врачĕ” хисеплĕ ята илме тивĕçлине саламласа, малашнехи ĕçре ăнăçу сунатпăр сире.