04 августа 2020 г.
Утă уйăхĕн вĕçĕнче "Ял пурнăçĕ" хаçатăн çывăх тусĕ, район хыпарçин Алманч тăрăхĕнчи общество корреспонденчĕ, Туçи Чуракассинче пурăнакан Аврам Николаевич Николаев 80 çулхи юбилейне паллă турĕ. А. Николаев хăйĕн кун-çулĕн пысăк пайне тăван хуçалăхпа çыхăнтарнă, шут ĕçченĕ пулнă, тивĕçлĕ канăва тухсан вырăнти ĕçпе вăрçă ветеранĕсен (пенсионерсен) канашне ертсе пынă. Çав паллă кун юбиляр ячĕпе питех те ăшă сăмахсем янăрарĕç. Уяв кĕрекине ларнă май Аврам Николаевича Алманч ял тăрăхĕн пуçлăхĕ В. Долгов, вырăнти ветерансен канашĕн председателĕн çумĕ А. Аврамова, Нимĕчкасси ял старости В. Аврамов, пĕлĕшĕсем саламларĕç, Тав çырăвĕ, хаклă парне пачĕç, çирĕп сывлăхпа канлĕ ватлăх сунчĕç. Районти “Ял пурнăçĕ” хаçат редакцийĕ те Аврам Николаевича юбилей ячĕпе ăшшăн саламлать. Çывăх çынсен тимлĕхĕпе ăшшийĕ вăй-хал кỹрсе тăтăр, Турă панă кашни кун савăнăç парнелетĕр сана. Ан чирле, ан ватăл, пул эс пирĕнпе пĕрле.