31 июля 2020 г.
“Халăх сурать кỹлĕ пулать” тенĕ ĕлĕкхи ватăсем. Çак сăмахсемпе килĕшмесĕр тăма май çук. Нумаях пулмасть каçхи сăвăм хыççăн Кỹлхĕрри ялĕн ĕçчен çыннисем ача-пăча лапамне пухăнма пуçларĕç. Пурте ĕç хатĕрĕсемпе. Кам кĕреçе-сенĕк, тимĕр çава, кĕрепле илсе килчĕç. Мотоблокпа килекенни те пулчĕ. Тăван тавралăх илемлĕрех, тасарах пултăр тесе ялти хастарсем ĕçе хаваспах тытăнчĕç. Ачасем: Егорпа Иван Ивановсем, Димăпа Костя Петровсем, Инессăпа Стас Владимировсем тата Максим Степанов ăпăр-тапăра, çулнă курăка пуçтарчĕç. Хуларан кукамăшĕ патне килнĕ Вова та чупсах ĕçлерĕ. Пĕчĕк Лиза та çулма вĕреннĕ, ав, В. Димитриев-студент мотоблок çине пĕр çĕре пухнă ватă курăка тиесе пуçтарчĕ. Çулталăкран иртнĕ Арина та чĕвĕлти сассипе ĕçлекенсене хавхалантарса тăчĕ. Е. Федорова, Г. Егорова, А. Владимирова, Любовь Петрова, И. Степанова, Г. Васильева, Людмила Петрова, Н. Любимова çавасемпе ỹссе кайнă курăка çулса тăкрĕç. Арçынсем: Ю. Федоров, Н. Потапов, В. Куприянов, К. Степанов, С. Тимофеев, С. Петров, Р. Любимов тримерпа çулчĕç. Хуларан килнĕ О. Алексеева та тимлесех ĕçлерĕ. Ĕç вĕресе кăна тăчĕ. Чылай вăхăт хушши тăрăшрĕç илем кĕртекенсем. Райпо лавккипе ача-пăча лапамĕ çывăхĕнчи тавралăха йĕркене кĕртрĕç. Нумай пулмасть ял вĕçĕнчи хапхана та С. Тимофеев староста сĕнĕвĕпе тимлĕ арçынсем тĕпрен юсаса сăрласа лартнă. Çитес вăхăтра ытти вырăнсенче ĕçлеме палăртрăмăр. Çапла пĕрле тытăнса ĕçлесен пур йывăр ĕçе те тума пулать. Шанас килет, малашне çакăн пек субботниксене ытти ялсенче те пурнăçлĕç. Г. Егоров.