31 июля 2020 г.
Чăваш Республикин Пуçлăхĕн должноçне йышăнас текен 5 кандидат Тĕп суйлав комиссине документсен тулли пакетне çитернĕ. Аса илтеретпĕр: кандидатсен пурин те регистраци валли хăйсемшĕн алă пуснисене тата ытти документа республикăн Тĕп суйлав комиссине (ТСК) утă уйăхĕн 24-мĕшĕнчи 18 сехетрен кая юлмасăр килсе памалла пулнă. Хăй тĕллĕн кандидата тăнă О. Николаев ку утăма чи малтан, утă уйăхĕн 23-мĕшĕнче ирхине тунă. Унсăр пуçне политика партийĕсен представителĕсем тăваттăшĕ те — С. Матвеев ("Раççей патриочĕсем"), А. Андреев (КПРФ), К. Степанов (ЛДПР), Н. Степанов ("Раççейри пенсионерсен социаллă тĕрĕслĕхĕшĕн тăракан партийĕ") — ТСКна документсене пырса панă. Вĕсем пурте депутатсем алă пуснисене муниципалитет “фильтрĕ” витĕр тухмашкăн кирлĕ чухлĕ пуçтарнă. Кандидата хăй тĕллĕн тăнă çынсен муниципалитет йĕркеленĕвĕсен депутачĕсен çеç мар, суйлав-çăсем хушшинче те хăйсене ырласа палăртса алă пуснисене пухмалла. “Кандидата хăй тĕллĕн тăнă Ю. Сидоровран утă уйăхĕн 24-мĕшĕнче ирхине хăйĕн кандидатурине каялла илесси пирки заявлени çитрĕ. Кандидата хăй тĕллĕн тăнă Н. Коклейкин регистрациленмешкĕн документсем пачĕ, анчах вĕсен хушшинче алă пуснă хутсемпе ырланине палăртнă хутсем çук”, — пĕлтернĕ Тĕп суйлав комиссийĕн официаллă сайтĕнче вырнаçтарнă информацире. Кандидата хăй тĕллĕн тăнă Ю. Шакеев, А. Ильдеменов, Р. Васильев, М. Чепель, П. Петрянкин алă пуснисене пухса çитереймен, тен, вĕсенчен хăшĕ-пĕри ку ĕçе пуçăнман та. Документсем тăратман тата алă пуснисене пухса çитереймен кандидатсене регистрацилемеççĕ. Хальхи вăхăтра ТСКра кандидат тăратнă доку-ментсене тата вĕсемшĕн алă пуснисене тĕрĕслеççĕ. Пĕтĕмлетỹ — суйлав бюллетеньне камсен хушаматне кĕртесси — çурла уйăхĕн пуçламăшĕнче паллă пулĕ.