31 июля 2020 г.
Чăваш Республикин Пуçлăхĕн тивĕçĕсене вăхăтлăх пурнăçлакан Олег Николаев “Çамрăк лидерсен команди” республика конкурсĕн çурма финалне тухнисемпе “çавра сĕтел” мелĕпе уçă калаçу ирттернĕ. Уçă тĕл пулăва Шупашкарти РАНХиГС йĕркеленĕ. Мала тухнисене регион Пуçлăхĕн тивĕçĕсене вăхăтлăх пурнăçлакан малашне те пысăк çитĕнỹсем патне ăнтăлма чĕнсе каланă, кăтартусемпе лăпланса лармалла маррине, ỹлĕмрен те ырми-канми тăрăшмаллине асăннă. “Сирĕнтен кашни тĕрĕс çул-йĕрпе пырать. Регион аталанăвне пысăк тỹпе хывмалла пултăрччĕ. Конкурс малалла та пулать. Пуçаруллă проектсене пĕрле пурнăçа кĕртсе пыма тăрăшăпăр. Республикăна аталантарас тесен, пирĕнтен кашнин пысăк çитĕнỹсем тăвассишĕн ĕçлемелле, вĕренỹ патне туртăнас кăмăл-туйăма сỹнтерсе лартма юрамасть, тавра курăмлăха ỹстерсе пымалла, тĕллевсем патне хастар çитмелле”, — тенĕ вăл. Чăваш Республикине аталантарма витĕм кỹрекен Комплекслă программăри ĕçсене пурнăçлама пĕрле туслăн килĕшсе яланах ĕçлеме тăрăшмалла, унти палăртнă мероприятисене тĕпе хурса халăхăн пурнăç условийĕн шайне лайăхлатса пыма витĕм кỹмелле тенĕ сăмаха çавăрса регион Пуçлăхĕн тивĕçĕсене вăхăтлăх пурнăçлакан. Официаллă пай вĕçленнĕ хыççăн, тỹрех çамрăк яш-кĕрĕм конкурсри ĕçсене пурнăçлама пикеннĕ. Жюри членĕсем вĕсен ăсталăхне курса хакланă. Финала пурĕ те 25 çын тухать, вĕсен вара ыттисемшĕн чăн-чăн паха тĕслĕх пулса тăмалла. Журналистсемпе тĕл пулса калаçнă май, Чăваш Республикин Пуçлăхĕн тивĕçĕсене вăхăтлăх пурнăçлакан çамрăксен савăк кăмăл-туйăмĕ, çитĕнỹ патне ăнтăлни, тата та лайăхрах ĕçлеме хавхалантарать тенĕ. Нарăс уйăхĕнче кадрсен резервне йĕркелессине çĕнĕлле пăхса тухма палăртса хăварнине те асăннă вăл сăмах май. Кун пек ăмăртусем шăпах та пултаруллă яш-кĕрĕме суйласа илме витĕм кỹнине каланă ертỹçĕ. Çамрăксем пĕр-пĕринпе курса калаçни, пĕр-пĕрин паха опытне тĕпе хурса çĕнĕрен те çĕнĕ проектсем хатĕрлени хăйех пысăк кăтарту. Бизнесра тăрăшакансемшĕн, влаç органĕсенче ĕçлекенсемшĕн çамрăксен пуçаруллă проекчĕсем яланах пĕлтерĕшлĕ. Аса илтеретпĕр, кăçал нарăс уйăхĕнче Чăваш Республикин Пуçлăхĕн тивĕçĕсене вăхăтлăх пурнăçлакан Олег Николаев çỹлерех асăннă ăмăртусем пирки указа алă пусса çирĕплетнĕ. Çамрăк лидерсем конкурса пурĕ 1579 çын хутшăнма кăмăл тунă. Çурма финалта 92 ача хăйсен ăсталăхне кăтартса панă. Тест пĕтĕмлетĕвĕсем тăрăх, вĕсен паха ĕçĕ ыттисемшĕн тĕслĕхре пулнă. “Управлени команди” тата “Çамрăк лидерсен команди” конкурссене Чăваш Республикин Пуçлăхĕн тивĕçĕсене вăхăтлăх пурнăçлакан Олег Николаев пуçарăвĕпе ирттереççĕ. Вĕсене çамрăксене социаллă пурнăç, экономика, обществăпа политика тытăмĕсенче ертỹçĕ должноçĕнче ĕçлеме илĕртес тĕллевпе йĕркеленĕ. Çакнашкал тупăшусем çамрăксене лидер ăсталăхне кăтартма, хăйсен пĕлĕвне тĕрĕслеме май параççĕ. Конкурса хутшăнакансем валли хатĕрленĕ ыйтусем ансат мар. Тупăшу çивĕч иртет. Конкурс хастар çамрăксене пĕр-пĕрин опычĕпе паллашма, тавра курăма анлăлатма, пĕлĕве тарăнлатма май парать — экономика, бизнес, аудит тата ытти те. Çамрăк яш-кĕрĕм пуласлăх çине хастар пăхать, кулленех çĕнĕрен те çĕнĕ вăй-хал хушса, çитĕнỹсем тума хавхалансах тăрăшать.