Публикации » Иккĕмĕш тапхăр çине куçнă

31 июля 2020 г.

 Чăваш Енре коронавирус инфекцийĕпе чирлесси чакса пынине кура унăн чару мерисене пăрахăçламалли 2-мĕш тапхăр çине куçнă. Çакăн çинчен калакан Указа ЧР Пуçлăхĕн тивĕçĕсене вăхăтлăх пурнăçлакан О. Николаев алă пуснă. Изоляцирен тухмалли иккĕмĕш тапхăра куçнă май 800 тăваткал метртан пĕчĕкрех суту-илỹ объекчĕсене, лицензи пур автошкулсене уçма ирĕк параççĕ. Çавăн пекех РФ тата ЧР спортăн пĕрлештернĕ командисен членĕсене тренировкăсем ирттерме май туса параççĕ. Кунта пĕр çын пуçне 4 тăваткал метртан кая мар вырăн пулмалла. Указпа килĕшỹллĕн, çĕнĕ коронавирус инфекцийĕпе чирленĕ, юн пусăмĕпе тата сывлав органĕсен чирĕсемпе асапланакансене медицина пулăшăвĕ кỹнĕ çĕрте санаторисемпе курортсене уçма ирĕк параççĕ. Çакăн пирки ертỹçĕсен ЧР Роспотребнадзор Управленине пĕлтермелле. Кун пек чухне организацисен ертỹçисемпе уйрăм предпринимательсен дезинфекци тăвассине, мĕн пур ĕçченсен маска тăхăнса çỹрессине, клиентсен ыйтăвне тивĕçтернĕ чухне сывлав органĕсен хỹтĕлев япалисене усă курнине тĕплĕн тĕрĕслесе тăмалла.