28 июля 2020 г.
Канашлура ведомство ĕçĕн пĕтĕмлетĕвĕсене пăхса тухнă, малашнехи тĕллевсене палăртнă тата Чăваш Республикин социаллă пурнăçпа экономика аталанăвĕн Комплекслă программинче çул-йĕр хуçалăхĕ енĕпе йышăннă мероприятисене сỹтсе явнă. Пиллĕк çуллăх программăра автомобиль çулĕсен нормативлă тăрăмне çĕнетсе пырассине, çавăн пекех кĕперсене юсассине тата ытти ыйтусем пирки мероприятисене кĕртсе хăварнă. Унсăр пуçне регион тата муниципалитетсем хушшинчи пĕтĕмĕшле усă куракан автомобиль çулĕсен çĕнĕ участокĕсене тунă чухне кивĕ грунтлă çулсене пăрахăçласа çĕнетсе пырассипе программăна та хута яма палăртнă. "Чăваш Ен Пуçлăхĕн тивĕçĕсене вăхăтлăх пурнăçлакан хушăвне пурнăçланă май Чăваш Ен Транспорт министерстви Сĕнтĕрвăрри тата Куславкка районĕсем хушшинчи грунтлă çулсене пĕтерес ĕçе пуçăннă. Паянхи кун эпир асăннă лаптăка çĕнетсе хута яма, объект хатĕрлеме проект тăватпăр", — тенĕ Чăваш Республикин транспорт тата çул-йĕр хуçалăх министрĕ Владимир Осипов. Чăваш Республикин транспорт министерствин ертỹçи, республика территорийĕпе иртекен пысăк хăвăртлăхлă транспорт магистралĕсен федераци проекчĕсене пурнăçлама хутшăнни çинчен те каласа панă, Мускав-Чулхула-Хусана (М-12) тата пысăк хăвăртлăхлă чугун çул магистралĕн Мускав-Хусан чукун çулне, Шупашкар хулин аэропорчĕн çуртне юсаса çĕнетес тĕллев лартни çинчен те пĕлтернĕ. Канашлу ĕçне пĕтĕмлетỹ тунă май Чăваш Ен Пуçлăхĕн тивĕçĕсене вăхăтлăх пурнăçлакан Олег Николаев транспорт тата çул-йĕр хуçалĕхĕн ыйтăвĕсене çирĕп тĕрĕслеве илнине палăртнă, мĕн пур ресурссемпе туллин те тухăçлă усă курмаллине асăрхаттарса хăварнă. "Иртнĕ çулсем пирки калас пулсан, çул-йĕр фондне пăхса хăварнă укçапа туллин усă курман. Халăх та çакна туйнă, пăшăрханса калаçнă", — тесе хыпарланă регион Ертỹçин тивĕçĕсене вăхăтлăх пурнăçлакан. Республикăна аталантармалли Комплекслă программа ку ĕçе малашне лайăхрах йĕркелеме витĕм кỹрессе шанса каланă, сахал мар федераци центрĕ тĕрев парасса та асăннă. Лару ĕçне ЧР экономикăн Пысăк канашĕн председателĕ А. Аксаков, федераци эксперчĕсен пысăк ушкăнĕ хутшăннă.