28 июля 2020 г.
Иртнĕ эрнекун Шупашкарта, К. Иванов ячĕллĕ Чăваш патшалăх академи драма театрĕнче ЧР экономикăн Пысăк канашĕн анлă ларăвĕ пулса иртнĕ. Унта регионăн 2020-2025 çулĕсенчи социаллă пурнăçпа экономика аталанăвĕн Комплекслă программин итоглă варианчĕн презентацийĕ пулнă. Тĕп документпа Чăваш Ен Пуçлăхĕн тивĕçĕсене вăхăтлăх пурнăçлакан О. Николаев паллаштарнă. Комплекслă программăна Пĕтĕм тĕнчери регионсен аталанăвĕн центрĕ туса хатĕрленĕ, ăна анлăн сỹтсе явнă. Унта 1400 проект тата программăллă мероприяти, вăл шутра инфратытăм тата социаллă сфера аталанăвĕн 1120 проекчĕ, çавăн пекех экономика аталанăвĕн 325 инвестици проекчĕ кĕнĕ. Программăна пурнăçа кĕртме 264 млрд тенкĕ кирлĕ пулать. “5 çул хушшинче, — тенĕ О. Николаев, — республикăра пурăнмалли виçерен пĕчĕкрех тупăш илекенсен хисепĕ 100 пин çын чухлĕ чакмалла, регионта туса илекен мĕн пур продукци хисепĕ 1,6 хут, ĕç тухăçлăхĕ — 1,26, промышленность продукцин хисепĕ — 1,37, ял хуçалăх продукцин калăпăшĕ 1,4 хут ỹсмелле”. Лару ĕçне ЧР экономикăн Пысăк канашĕн председателĕ А. Аксаков, федераци эксперчĕсен пысăк ушкăнĕ хутшăннă.