24 июля 2020 г.
Район администрацийĕн пуçлăхĕ А. Кузнецов тунтикунсерен иртекен тĕп канашлура Трак енĕн 2021-2025 çулĕсенчи социаллă пурнăçпа экономика аталанăвĕн программипе паллаштарнă. Вĕсем пысăк та анлă. Çул-йĕр инфратытăмĕ: Çĕньял Чуракасси ялĕнче автоçул тăвасси; Красноармейски ялĕнче хытă сийлĕ автоçулсене (кăнтăр-хĕвел анăç районĕнчи 5 урама; кăнтăр-хĕвел тухăç микрорайонĕнчи 8 урама, Союзная урама) ĕçе кĕртесси; урамсене çутăпа тивĕçтересси; тротуарсем тăвасси. Вĕрентỹ: Трак вăтам шкулĕ çумĕнче бассейн тумалла; Трак, Красноармейски, Алманч, Мăн Шетмĕ вăтам, Кĕçĕн Шетмĕри пĕтĕмĕшле пĕлỹ паракан тĕп шкула тĕпрен юсамалла; "Çеçпĕл", "Чебурашка", "Колосок" ача сачĕсене тĕпрен юсамалла; 6 вĕренỹ учрежденийĕнчи чỹрече блокĕсене улăштармалла. 3 фельдшерпа акушер пункчĕ тумалла: Нимĕчкассинче, Крентейкассинче тата Супарта. Райцентрти Ленин урамĕнче ăшăпа тата вĕри шывпа тивĕçтерекен тытăма юсаса çĕнетмелле. Муниципаллă пурлăхри 22 шыв башнине тĕпрен юсамалла. Красноармейски ялĕнчи КОС-1400 тасатакан сооруженин проектпа смета документацине хатĕрлесе тĕпрен юсамалла. Культурăпа спорт енĕпе: Красноармейски ялĕнче виçĕ хутлă, 300 вырăнлă культура çурчĕ çĕклеме палăртаççĕ; Яманакра культура çурчĕ тума, ялсенчи кану центрĕсемпе çурчĕсене юсама, райцентрти Чапаев урамĕнче стадион-площадка тума пăхаççĕ. Райцентрти тĕп стадиона çĕнетсе унта искусственнăй виткĕчлĕ футбол уйĕ тума палăртнă. Ăна кăçалхи çурла уйăхĕн вĕçĕнче ĕçе яма пăхнă. 2020-2025 çулсенче Чăваш Енĕн социаллă пурнăçпа экономика аталанăвĕн программипе килĕшỹллĕн, Трак енре инфратытăм аталанăвĕн 34 проекчĕпе 12 коммерци проектне ĕçе кĕртмелле.