24 июля 2020 г.
Красноармейскинче Чăваш Ен Пуçлăхне суйлама тăратнă кандидатăн О. Николаевăн Халăх штабĕ (вăл райцентрти Ленин урамĕнчи 16-мĕш çуртра, райпон административлă çурчĕн иккĕмĕш хутĕнче вырнаçнă) суйлавçăсене курнăçмалли, вĕсене пуплемелли, пулас сасăлавра çĕкленекен ыйтусене татса памалли вырăн пулчĕ тесен те йăнăш мар пулĕ. Ăна уçнăранпа вунă кун иртрĕ. ЧР Пуçлăхне суйлама тăратнă кандидат О. Николаев регистрациленме суйлавçăсем алă пуснин хисепне пухса çитернĕ. Апла пулин те суйлавçăсем çав-çавах штаба килеççĕ. Ĕнерхи кун тĕлне Трак енри 150 суйлавçă Олег Алексеевичшăн алă пусса панă. Ку енĕпе волонтерсем малалла ĕçлеççĕ. Эпĕ Трак вăтам шкулĕн директорĕпе, Чăваш Республикин тава тивĕçлĕ вĕрентекенĕпе И. Федоровăпа сăмахларăм. — Авăн уйăхĕн 13-мĕшĕнче иртекен суйлавра эпĕ камшăн сасăлассине çирĕппĕн палăртса хунă. Паян Чăваш Ен Пуçлăхне суйланма тăратнă кандидатсем йышлă. ЧР пуçлăхĕн тивĕçĕсене вăхăтлăх пурнăçлакан О. Николаев — паянхи вăхăт ыйтакан, çĕнĕ шухăшлавлă ертỹçĕ. Вăл кĕске вăхăтрах малашлăха пăхакан профессионалсен командине йĕркелеме пултарчĕ, ертсе пырас ĕçри паха енсене кăтартрĕ. О. Николаев пирвайхи кунсенченех республикăри вĕрентỹ тытăмĕ çине тимлĕх уйăрчĕ. Акă, пирĕн Трак вăтам шкулне икĕ тапхăрпа юсаса çĕнетме пăхнă. 2020-2021 вĕренỹ çулĕ валли регионти "Паянхи шкул" проектпа, "Вĕренỹ" наци проекчĕпе тĕрлĕ бюджетсенчен 14 млн тенкĕ уйăрнă. Халĕ строительсем электросеть тытăмне тĕппипе çĕнетеççĕ. Кивĕ пĕр сыпăк электропралук та юлмĕ.Электроэнерги перекетлекен лампăсем вырнаçтаратпăр. Унччен эпир вĕренỹ çулĕ тăршшĕнче электроэнергишĕн 600 пин тенкĕ тỹленĕ пулсан, халĕ çак хисеп чылай пĕчĕкленессе шанатпăр. Унсăр пуçне ăшă тытăмне, канализацие, санузелсене тĕпрен улăштаратпăр. Авăн уйăхĕн 1-мĕшĕнче ачасене çутă та таса, çĕнелнĕ пĕлỹ керменĕ кĕтсе илĕ. Çитес çул вара шкулта юсавăн иккĕмĕш тапхăрĕ пулмалла. Çакна валли 31 млн тенкĕ уйăрма пăхаççĕ, — терĕ Ирина Аркадьевна. Кунтах эпĕ районти ĕçпе вăрçă ветеранĕсен (пенсионерсен) канашĕн ертỹçине Г. Ефимова тĕл пултăм. — Маншăн О. Николаев шăпах çак должноçре ĕçлемелли çын, ăна эпĕ Чăваш Енĕн тивĕçлĕ патриочĕ тесе шутлатăп. Пултаруллă чăн-чăн чăваш вăл. Кăçал эпир Тăван çĕршывăн Аслă вăрçинче Çĕнтерỹ тунăранпа 75 çул çитнине паллă турăмăр. Хаяр вăрçăн паттăрĕсене, юратнă çĕрĕм-шывшăн пурнăçне шеллемесĕр çапăçнă, пуç хунă фронтовиксене асра тытасси тĕпре пулмалла тесе шутлать Олег Алексеевич. Ахальтен мар вăл 2021 çула Чăваш Енре Сăр тата Хусан оборона чиккисене тăвакансен ĕç паттăрлăхне халалланă çулталăк тесе пĕлтерчĕ. Çамрăк ăру иртнĕ вăрçăра Çĕнтерỹ еплерех туптаннине пĕлтĕр. Унсăр пуçне О. Николаев çине тăнипе ЧР Патшалăх Канашĕ "Вăрçă ачисем çинчен" калакан саккуна йышăнма пултарчĕ, — палăртрĕ Георгий Леонидович. Пĕлетпĕр ĕнтĕ, ЧР Пуçлăхне суйланма тăратнă кандидатсем вун иккĕн. Утă уйăхĕн 8-мĕшĕнче вĕсенчен 5-шĕ пирĕн районăн тата Трак енри ял тăрăхĕсен депутачĕсен Пухăвĕн депутачĕсемпе тĕл пулнăччĕ. Трак енре ытти кандидатсемшĕн обществăлла йышăну пỹлĕмĕсем уçман, алă пустарассине йĕркеленине палăртмарĕç. Ю. Борисов