21 июля 2020 г.
Вăхăт шав малалла васкать. Иртнĕ кунсенче Кĕçĕн Шетмĕ тăрăхĕнчи хисеплĕ ватă, тыл ĕçченĕ Агафия Мироновна Миронова 90 çулхи юбилейне паллă турĕ. С. Самсонов Пĕртте çăмăл килмен Агафия аппан кун-çулĕ. Пурнăç ăна темле те пăркăчланă, анчах вăл пачах та хуçăлман. Агафия Мироновна яланах шанăçпа пурăннă, ырра шаннă. Юратнă ĕç ăна тулли ăраскал панă. А. Миронова 1930 çулхи утă уйăхĕнче Ванюшкасси ялĕнчи колхозник çемйинче çуралнă. Ялти шкулăн тăватă класне вĕренсе пĕтернĕ. Кĕçĕн Шетмĕри çичĕ класлă шкулта пĕлỹ пухнă. Йывăр чир пăркăчланă ăна, мĕн пĕчĕкрен иккĕмĕш ушкăн инваличĕ пулса тăнă. Çемьере ултă ача çитĕннĕ вĕсем. Пурнăçĕ пĕртте çăмăл пулман. Çавăнпа ир-ирех "турта хушшине" тăма тивнĕ хĕр ачан. Кĕçех Тăван çĕршывăн Аслă вăрçи пуçланнă. Мĕн пур йывăрлăх яла юлнă ватăсемпе ача-пăча çине тиеннĕ. Çав çулсенче А. Миронова Йĕпреç вăрманĕсенче ĕçленĕ. А. Миронова çемьеллĕ пулайман, ачи-пăчи те çук. Тăванĕсем те пурнăçран уйрăлнă. Ăна 12 çул ĕнтĕ тăванĕн хĕрĕ Людмила Арюхина пăхса пурăнать. Юбиляра çак паллă кун ячĕпе Кĕçĕн Шетмĕ ял тăрăхĕн специалисчĕсем М. Александрова, Е. Афанасьева тата "Нива" ЯХПКан тĕп экономисчĕ Т. Павлова, пĕлĕшĕсем саламларĕç, çирĕп сывлăх, канлĕ ватлăх, ăш пиллĕх сунчĕç. Маргарита Анатольевнăпа Татьяна Валентиновна хисеплĕ ватăна Раççей Президенчĕн В. Путинăн Тав çырăвне, "Вăрçă ачисем" удостоверени, хаклă парне пачĕç, чечек çыххисем тыттарчĕç. Агафия Мироновна хăйне çакăн пек саламланăшăн чĕререн тав турĕ.