07 июля 2020 г.
Шăрăх кунсем пуçланнăран Чăваш Енре пушар тухас хăрушлăх пысăк. Гидрометцентр пĕлтернĕ тăрăх, июлĕн 5—7-мĕшĕсенче аслатиллĕ çумăр, сывлăш температури каçсерен 16-21 градус, кăнтăрла 32 градуса çитет. Çавăнпа та хамăр тăрăхри вăрмансенче пушар тухас хăрушлăх (IV класс) пысăк пулнине палăртаççĕ. Аса илтеретпĕр, Чăваш Республикин Министрсен Кабинечĕ пуш уйăхĕн 31-мĕшĕнчи 142-мĕш номерлĕ йышăнупа килĕшỹл-лĕн ака уйăхĕн 4-мĕшĕнчен пушар хăрушсăрлăхĕн ятарлă режимне çирĕплетнĕ. Çавăнпа та вăрманта хĕрỹ кунсенче кăвайт чĕртме, кăвар çинче тĕрлĕ апат-çимĕç хатĕрлеме, çỹп-çапа çунтарма юрамасть. Халăха тимлĕ пулма ыйтать. Çавăн пекех вăрманпа çывăх çĕр участокĕсенче типĕ курăка çунтарма юраманнине палăртса калать. Пушар тухас хăрушлăх пысăк чухне çынсене вăрмана кĕме чараççĕ. Çак тапхăрта пушар хăрушсăрлăхĕн ятарлă режимне пăхăнманшăн икĕ хут ỹстерсе штраф параççĕ: граждансене — 4 пин, должноçри çынсене — 30 пин, юридици сăпачĕсене — 400 пин тенкĕ таран. Пушара пула сиен кỹрекенсене уголовлă майпа явап тыттараççĕ. Хальхи вăхăтра пушар хăрушсăрлăхĕн ятарлă режимне пăхăнманшăн 129 çынна явап тыттарнă: 111-шĕ — граждансем, 18-шĕ — должноçри çынсем. Ял çыннисене тата яла килнĕ хăнасене госкомитет тимлĕ пулма хистет: кил çумĕнчи çĕр лаптăкĕ çинче çỹп-çапа çунтарма, вăрман çывăхĕнче кăвайт чĕртме, унта ăпăр-тапăр пăрахма, уйрăмах кантăк тата çуллă япаласем. Çынсене яланах асăрхануллă пулма ыйтать. М. Романова.