30 июня 2020 г.
Чăваш Республикин Пуçлăхĕн тивĕçĕсене вăхăтлăх пурнăçлакан Олег Николаев И.Н. Ульянов ячĕллĕ Чăваш патшалăх университетĕнче чи лайăх вĕренекенсемпе видеоçыхăну мелĕпе савăнăçлă мероприяти ирттернĕ. Чи лайăх вĕренекен 100 ачапа, пысăк çитĕнỹсемпе спортра, культурăра, тĕрлĕ тĕпчев ĕçĕсенче палăрнисемпе уçă калаçура пĕр-пĕрин шухăш-кăмăлĕпе паллашнă. Вĕренỹре пысăк çитĕнỹсемпе палăрнисене мухтаса тав сăмахĕсем каланă Чăваш Республикин Пуçлăхĕн тивĕçĕсене вăхăтлăх пурнăçлакан. Сăмаха май, паянхи пурнăç таппинче çитĕнекен ăрăва патшалăх енчен сахал мар пулăшу куçнине хыпарланă Олег Николаев. “Çĕршыв Президенчĕ Владимир Путин аслă вĕрентекенĕмĕрсен юхăмне вăй илтерсе пымаллине час-часах асăнать. Сирĕн пуласлăх патне туртăнас текен туйăм, пуçарулăх, пурнăçа ырă енне куçарас текен шухăш-кăмăлăр пысăк пулни çав тери пĕлтерĕшлĕ. Сире пурăнма хăтлă та лайăх пурнăç пултăр тесе, хамăртан мĕн килнине пĕтĕмпех йĕркелесе пама тăрăшăпăр. Ентешĕмĕрсем, сире министерствăсенче, муниципалитет пĕрлешĕвĕсенче ĕçлеме сĕнетпĕр. Тĕрлĕ сферăра тăрăшса, республикăн социаллă пурнăçĕпе экономика аталанăвне витĕм кỹме йыхравлатпăр. Халăхăн пурнăç условийĕн шайне лайăхлатса пырас ĕçе хастар хутшăнасса шанатпăр”, — тенĕ Чăваш Республикин Пуçлăхĕн тивĕçĕсене вăхăтлăх пурнăçлакан Олег Николаев. Çамрăк яш-кĕрĕме çавăн пекех Раççей Федерацийĕн Патшалăх Думин депутачĕ Алена Аршинова, И.Н. Ульянов ячĕллĕ Чăваш патшалăх университечĕн ректорĕ Андрей Александров саламланă, пурнăç çулне тĕрĕс суйласа илме сĕннĕ.