19 июня 2020 г.
Чăваш Республикин Пуçлăхĕн суйлавне хутшăнасси пирки Чăваш Ен ертỹçин тивĕçĕсене вăхăтлăх пурнăçлакан О. Николаев çĕртмен 13-мĕшĕнче муниципалитет йĕркеленĕвĕсен пуçлăхĕсемпе ирттернĕ канашлура пĕлтернĕ. “Кандидатурăна хам тĕллĕн тăратма йышăнтăм. Çакă Чăваш Республикинчи партисене пĕрлештерме пулăшасса шанатăп”, — тенĕ вăл Улатăр районĕнчен панă ыйтăва хуравласа. Çавăн пекех О. Николаев Чăваш Енри вăйсене пĕр шухăш-тĕллевпе çыхăнтарни “пĕлтерĕшлĕ ĕçсем тума, республикăри лару-тăрăва лайăх енне улăштарма май парассине” ĕненнине палăртнă. Сăмах май, кăçалхи суйлав О. Николаевшăн иккĕмĕш пулать. Пĕр-ремĕш хут Олег Алексеевич сасăлава 2015 çулта хутшăннă, 14,73 процент сасă пухса иккĕмĕш вырăн йышăннă. Кăçалхи кăрлачăн 29-мĕшĕнче РФ Президенчĕн В. Путинăн йышăнăвĕпе республика ертỹçин тивĕçĕсене вăхăтлăх пурнăçлама тытăннă. Унччен вăл РФ Патшалăх Думин комитечĕн председателĕ, “Справедливая Россия” партин Чăваш Енри уйрăмĕн лидерĕ пулнă. Нарăсăн 15-мĕшĕнче ăна хăй ыйтнипе парти уйрăмĕн ертỹçин полномочийĕсенчен хăтарнă, парти билетне упраса хăварнă.