09 июня 2020 г.
Çĕртме уйăхĕн 5-мĕшĕнче “Чăваш патшалăхне Раççей Федерацийĕн условийĕсенче аталантарасси: иртнĕ, хальхи, пуласлăх” ятлă Пĕтĕм тĕнчери ăслăлăх-практика конференцийĕ иртрĕ. Коронавируса пула И.Н. Ульянов ячĕллĕ Чăваш патшалăх университечĕн базинче мероприятине дистанци мелĕпе ирттернĕ. Регион Пуçлăхĕн тивĕçĕсене вăхăтлăх пурнăçлакан О. Николаев конференцие хутшăнакансене пурне те саламланă. Паллă профессорсене, наука ĕçченĕсене мухтаса тав сăмахĕсем каланă. Хăнасем Японирен, СШАран, Австрирен тата Раççейрен пулнă. "Пирĕн çĕршывăн тĕп уявĕ — Раççей кунĕ, çавăн пекех Чăваш Енĕн тĕп уявĕ — Республика кунĕ те. Эпир патшалăха аталантарассине халалласа ăслăлăхпа практика конференцийĕ ирттеретпĕр, пирĕн Тăван çĕршывăн пуласлăхĕ çинчен питĕ кирлĕ ыйтусене сỹтсе яватпăр. Çак уяв наци пĕрлĕхĕн тата çĕршывăн хальхи тата пуласлăхĕшĕн пирĕн пĕтĕмĕшле яваплăхĕн символĕ пулать. Çĕршыв Президенчĕн Владимир Владимирович Путинăн авторитетне пула. Раççей право демократиллĕ патшалăх пек ăнăçлă аталанать, унпа пĕрле — çĕршыв регионĕсем те", — тенĕ хăйăн сăмахĕнче Чăваш Ен Пуçлăхĕн тивĕçĕсене вăхăтлăх пурнăçлакан Олег Николаев. Чăваш патшалăх университечĕн ректорĕ Андрей Александров Чăваш Еншĕн кирлĕ ыйтăва — Сăр тата Хусанти оборона чиккисене — пурне те пĕрле тарăн тĕпчемеллине палăртнă. Вăл Чăваш Енĕн чи пысăк вузĕ çак ĕçе хастар хутшăнасса шантарнă. Аса илтеретпĕр, Чăваш Енре Чăваш Республикинче 2021 çула Сăр тата Хусан хỹтĕлев вырăнĕсене тума хутшăннисен ĕçри паттăрлăхне халалланă çулталăк тесе пĕлтересси çинчен указа алă пуснă. “Пĕрле ĕçлеме хатĕр пулнăшăн сире тав тăватăп. Влаçри çынсем, наукăпа вĕренỹ сферин представителĕсем, общество ĕçченĕсем тата республикăра пурăнакан ахаль çынсем пĕр-пĕринпе тачă çыхăнса ĕçлени нумай япалана тума май парасса шанатăп”, — пĕтĕмлетнĕ хăйĕн сăмахне республика Пуçлăхĕн тивĕçĕсене вăхăтлăх пурнăçлакан О. Николаев.