02 июня 2020 г.
Эмелпе çыхăннă темăн пĕлтерĕшĕ нихăçан та чакас çук, пушшех хальхи лару-тăрура. Чăн та, пулăшнине пĕлсен укçине те хĕрхенмĕн. Шел те, иккĕленỹллĕ эмелсем çулсерен тупса палăртаççĕ Россельхознадзор специалисчĕсем. Федерацин çак ведомстви выльăх-чĕрлĕхе сиплеме усă куракан эмелсене, вĕсене мĕнле упранине тĕрĕслет. Шанчăксăр эмелсем тупса палăртни пирки сайтра çĕнĕрен те çĕнĕ информаци вырнаçтараççĕ. Ветаптекăра туяннă сиплев япалисем килĕшменни е ытти иккĕленỹ пирки çырнă çырусем тăрăх та çийĕнчех тĕпчев ĕçĕсем йĕркеленине палăртмалла. Тĕрĕслевсем Чăваш Республикинче те суя эмелсем пулнине çирĕплетеççĕ. Пĕлтĕр сăмахран, Пăрачкав районĕнче пĕр обществăра тĕрĕслев ирттернĕ чухне “Неофурол” текен эмел иккĕленỹ çуратнă. Препарата, чăн та, регистрацилемен иккен. Кунсăр пуçне ветеринарире усă курма юракан эмел хатĕрĕсен реестрне кĕртменни те çиеле тухнă. Патшалăх аслă инспекторĕ Оксана Викторова каласа панă тăрăх, пахалăха палăртас тĕллевпе республика территорийĕнче суйласа илсе эмелсен 33 тĕслĕхне Мускавра ятарласа тĕпчеттернĕ май вара виçĕ препарат пахалăхсăрри палăрнă: “Универм”, “Новокаин”, “Кальция хлорид”. Шупашкар хулинче, Комсомольски тата Хĕрлĕ Чутай районĕсенче сутнă çав флаконсене тĕп тума тивнĕ. Кăçал çу уйăхĕн пуçламăшĕ тĕлне Шупашкар хулинче тупса палăртнă пахалăхсăр “Мазь Вишневского” (требованисемпе килĕшсе тăман) препарата та çав шăпах пырса тивнĕ. 2020 çулта тата ку енпе лицензисĕрех услам тунă 4 тĕслĕхе тăрă шыв çине кăларнă: Шупашкар тата Çĕрпỹ хулисенче. Сиплев япалисене кирлĕ пек упраман тĕслĕхсем тĕлĕшпе те кăçал явап тыттарма тивнĕ. Йĕркене пăхăнман кунашкал тĕслĕхсем Комсомольски тата Сĕн-тĕрвăрри районĕсенче пулнă. Пĕтĕмĕшле илсен, тĕрĕслевсем кăтартнă тăрăх, эмелсене упрамалли условисене пăхăнманни — çине-çинех тĕл пулакан йĕркесĕрлĕх.
Н. Васильева,
Россельхознадзорăн Чăваш Республикинчи тата Чĕмпĕр облаçĕнчи управленийĕн ĕçченĕ.