26 мая 2020 г.
Апрелĕн 1-мĕшĕнчен Раççейре çурхи призыв кампанийĕ пуçланнă. Çара 18-27 çулхи каччăсене илеççĕ. Çулталăкра икĕ хут Тăван çĕршыв çамрăксене çар тивĕçне пурнăçлама чĕнет. Иртнĕ эрнере Красноармейски район администрацийĕн пуçлăхĕ Александр Кузнецов ерт-се пыракан çар комиссийĕн пĕрремĕш ларăвĕ иртнĕ. Комисси йышĕнче Чăваш Республикин Çĕрпỹ, Красноармейски, Вăрмар тата Куславкка районĕсен çар комиссарĕ Валерий Буклаков, Чăваш Республикинчи контрактпа çар службине каймалли суйлав пункчĕн представителĕ Игорь Ким, çар комиссийĕн членĕсем пулнă. Эпидемиологи лару-тăрăвне пула призывниксен хăрушсăрлăхне май килнĕ таран тивĕçтерес тесе тăрăшнă: хỹтĕлев медицина маскисем, ỹт-пỹ температурине виçни, алăсене антисептикпа тасатни. Çавăн пекех Тăван çĕршывăн пулас хỹтĕ-левçисенчен 7 кун маларах коронавирус инфекцийĕ çине анализ илеççĕ. Результатсем йĕркеллĕ пулсан призывниксене пухăнмалли вырăна ăсатаççĕ. Пулас салтаксем унта та тепĕр хут медосмотр тухаççĕ, Covid-19 çине экпресс-тест параççĕ. Енчен те анализ кăтартăвĕсем аван пулсан каччăсене çар службине тухмалли вырăна илсе çитереççĕ. “Юлашки çулсенче каччăсем Раççей çар ретне хаваспах каяççĕ. Яшсем хăйсем валли çар профессине суйласа илни те савăнтарать”, — палăртнă ЧР Çĕрпỹ, Красноармейски, Вăрмар тата Куславкка районĕсен çар комиссарĕ В. Буклаков. Красноармейски район администрацийĕн пуçлăхĕ А. Кузнецов çамрăксене тивĕçлĕ служба суннă. Çавăн пекех комисси ларăвĕнче контрактпа служба тухмалли вариантсене те пăхса тухнă. Аслă е вăтам професси пĕлĕвĕ илнĕ каччăсем тỹрех çар службинче икĕ çул хушши тăмалли контракта алă пусма пултарнине те палăртнă. Ун пек чухне вĕсем чылай çăмăллăхпа усă кураççĕ. Çара каймалли вăхăта 2020 çулхи июнĕн 16-мĕшне куçарнă.