26 мая 2020 г.
Олег Николаев пуçарăвĕпе Чăваш Енре наци проекчĕсен порталĕ ĕçлеме пуçларĕ
Ака уйăхĕн 16-мĕшĕнче Чăваш Республикин Пуçлăхĕн тивĕçĕсене вăхăтлăх пурнăçлакан Олег Николаев информаци ресурсĕсен пĕрлехи центрне уçнă çĕре хутшăннă. Ку центрта наци проекчĕсене регионта мĕнлерех пурнăçласа пыни çинчен пĕлтерсе тăракан хыпарсене туллин вырнаçтарса пырĕç. Асăннă Портала Чăваш Республикин Пуçлăхĕн тивĕçĕсене вăхăтлăх пурнăçлакан Олег Николаев пуçарнипе хута янă. Чăваш Республикин информаци политикин министерстви хушăва вăраха тăсмасăрах пурнăçа та кĕртнĕ. “Наци проекчĕсене пурнăçласа пынине Раççей Федерацийĕн Президенчĕ Владимир Владимирович Путин хăй çирĕп тĕрĕслеве илнĕ. Наци проекчĕсене пурнăçлама федераци центрĕнчен сахал мар укçа-тенкĕ тăкакланать. Раççей Федерацийĕн федераци хыснинчен планпа килĕ-шỹллĕн, мĕнпур укçа вăхăтра тата туллин куçса пырать. Халăхăн пурнăç условийĕн шайĕ кулленех лайăхланса ырă еннелле куçса пыни те никамшăн та вăрттăнлăх мар. Регионта пурнăçланакан ĕçсем пирки çынсене вăхăтра тата туллин пĕлтерсе тăни паха. Халăх объектсене курать, вĕсемшĕн хавхаланса пурăнать. Шăпах та, асăннă Портала çак тĕллевпе пурнăçа кĕртнĕ те”, — тесе каланă Чăваш Республикин Пуçлăхĕн тивĕçĕсене вăхăтлăх пурнăçлакан Олег Николаев. Чăваш Республикин информаци политикин министрĕ Михаил Анисимов хăйĕн сăмахĕнче http,ỸỸnpĕcapĕru Портала хута яма “Чăваш Республикин ИТ-Кластерĕ” информаци технологийĕсен Ассоциацийĕ сахал мар пулăшнине хыпарланă. “Кĕске вăхăт хушшинче пĕрремĕш онлайн-хакатон ĕçлеттерсе янă. Унта Раççейри 25 ушкăн, çав шутра Шупашкартан, Оренбургран, Тюменьрен сахал мар специалист хутшăннă. Кашни ушкăн хăйне евĕр ĕçленĕ, вĕсем çирĕп йĕрке пултăр тесе тăрăшнă. Наци проекчĕпе çыхăннă хыпарсене тухăçлă хатĕрлесе тăратасси пирки тĕплĕ шухăшланă”, — тесе пĕлтернĕ Михаил Анисимов. Портал пĕтĕмпе тăватă пайран тăрать, вĕсенче пĕтĕмпех наци проекчĕпе çыхăннă анлă хыпарсене вырнаçтарнă. Нормативлă никĕс докуменчĕсем те çав блоксенче чылай. Пĕр сăмахпа каласан, халăх валли çителĕклĕ таран хыпар вырнаçтарнă. Палăртма кăмăллă, видео, фотоматериалсем те куç умĕнчех пулĕç. Порталăн ĕçĕпе республикăри ĕç тăвакан влаç органĕсенче тăрăшакансем кулленех усă кураççĕ. Министерство ертỹçисем те çĕнĕ ресурса хапăл туни куçкĕретех. “Интерактивлă карттăра объектсем пирки хыпарсем пур. Вĕсем хăçан тата ăçта хута каясси те пĕтĕмпех паллă. Халăха вуласа пĕлме питĕ ансат. Регионти проектсем кунта хăйсен вырăнне тупнă. Хыпарсем пĕтĕмпех паянхи пурнăç таппипе тỹр килсе тăраççĕ”, — тесе каланă хăйĕн сăмахне Чăваш Республикин вĕренỹ тата çамрăксен политикин министрĕ Сергей Яковлев. “Хăй вăхăтĕнче наци проекчĕсене тĕрĕслесе пынă вăхăтра, эпĕ ертỹçĕ пулнăччĕ. Тулли информацисене пĕр ресурса вырнаçтарса пыни халăхшăн та, ертỹçĕсемшĕн те питĕ вырăнлă тесе палăртнăччĕ. Кашни регионта наци проекчĕсемпе епле ĕçлесе пынине вăл центрта вуласа пĕлме меллĕ. Пĕр-пĕрин паха ĕç опытне те курма пулать”, — тенĕ Олег Николаев.