26 мая 2020 г.
Çак ваттисен сăмахĕ паянхи куншăн питĕ вырăнлă та вăхăтлă тееттĕм. Анчах та пур ача садĕнче те шăпăрлансем валли пăтă пĕçерме лайăхах кĕрпепе усă курмаççĕ иккен. Лаборатори ĕçченĕсем пахалăхсăр тесе çирĕплетнĕ кĕрперен пĕçернĕ пăтăран вара уссиех пур-ши? Россельхознадзорăн республикăри управленийĕн инспекторĕсем каланă тăрăх, юлашки çулсенче тырă продукчĕсене ача сачĕсенче тата вĕрентỹ учрежденийĕсенче закупка йĕркипе туяннă чухне саккуна уяма тăрăшаççĕ. Кунта тĕрлĕ канашлура, халăх итлевĕсенче ирттернĕ ăнлантару ĕçĕсен витĕмĕ те пуррине хирĕçлеймĕн. Çапах та яланах, йăлтах асăрхаса çитереймеççĕ çав. Тĕрĕслевсем вăхăтĕнче иккĕленỹ çуратакан кĕрпе таврашне лабораторисене ăсатаççĕ. Тĕпчевсем, сăмахран, ытти çулсенче кĕрпере çын сывлăхне сиен кỹрекен кăпшанкă тупса палăртнă тĕслĕх те пулнăччĕ. Кăçалхи пĕрремĕш кварталта кунашкалли пулман, çапах явап тыттарма ытти сăлтавсем тупăннă. Тĕслĕхрен, Красноармейски районĕнчи пĕр вĕрентỹ учрежденийĕнче кĕрпесене вĕсен хăрушсăрлăхне тата пахалăхне çирĕплетекен документсемсĕрех туяннă. Унта Тивĕçтерỹ декларацийĕ (Декларация о соответствии) тата тĕпчевсен протоколĕсем пулман. Шкул çулне çитмен ачасен хăш-пĕр учрежденийĕсенче ГОСТ требованийĕсене тивĕçтермен кĕрпесемпе усă курнă. Патăрьел районĕнчи ача садĕнче вара маркировка çинче тулли информаци кăтартман тĕслĕх çиеле тухнă. Кĕрпен номерĕ çуккиех тавар çинчен тулли информаци пĕлме кансĕрлет тата çак таварăн пахалăхĕнче иккĕленỹ çуратать. Пĕтĕмпе кăçалхи 3 уйăх хушшинче 5,51 пин тонна кĕрпе таврашĕ тĕрĕслев витĕр кăларнă. Çавна май темиçе парти требованисене тивĕçтерменни çиеле тухнă: Вăрнар, Красноармейски районĕсенче. Çав партисемпе усă курма чарнă. Патшалăх аслă инспекторĕ Светлана Ярусова палăртнă тăрăх, кунашкал продукци хăрушсăрлăхне тата пахалăхне çирĕплетекен документсемсĕрех (сертификат соответствия, декларация о соответствии, протокол испытаний) сутни-туянни час-часах тĕл пулать. Тырă тата унран хатĕрленĕ продукцие тĕрĕс упрасси пĕлтерĕшлĕ, анчах та çакна пур çĕрте те асăрхаса çитереймеççĕ. Асăрхаттарусăр май килмест: управри сывлăш нỹрĕклĕхĕ тата температура, санитари енчен — тырă хăрушсăрлăхне тата пахалăхне упраса хăварассин условийĕсем тĕлĕшпе. Калас пулать, пĕлтĕр те пахалăхсăр кĕрпесен партийĕсене тупса палăртнă. Пĕтĕмпе 20,182 тонна, çав шутра хура тулă — 0,157 тонна, “Полтавская” тулă — 20 тонна тата “Артек” тулă — 0,025 тонна.
Н. Васильева.