22 мая 2020 г.
Ăшă кунсем çывхарнă май çул-йĕр хăрушсăрлăхĕн патшалăх инспекцийĕ ашшĕ-амăшне çул çитменнисем çине уйрăмах тимлĕх уйăрма ыйтать. Хăйсене уйрăм тытмалли йĕрке тапхăрĕнче (самоизоляци), Пĕтĕм Раççейри "Дома учим ПДД" интернет-марафонпа килĕшỹллĕн, çул çитменнисемпе тепĕр хут çул-йĕр правилисене пăхса тухаççĕ. Çĕршывăн мĕн пур регионĕнче çул-йĕр хăрушсăрлăхĕн патшалăх инспекцийĕн ĕçченĕсем вĕренекенсемпе онлайн-занятисем, социаллă сетьсенче "тỹрĕ эфир" йĕркелеççĕ, видеоуроксем çыраççĕ. Шкул ачисем килте пулнă май, самоизоляци йĕркинчен тухсан каникул кунĕсен пысăк пайне урамра ирттереççĕ, велосипедпа, мопедпа, скутерпа, ытти хатĕр-хĕтĕрпе ярăнма кăмăллаççĕ. Кун пек чухне вĕсем хăрушсăрлăх пирки шутламаççĕ те. Ашшĕ-амăшĕ те çакăн çине тимлĕх сахал уйăрать, ачисене шлемпа, хỹтĕлевĕн ытти элеменчĕсемпе тивĕçтерес ыйтăва малти вырăна кăлармасть. Тепĕр чухне çакă вара пысăк инкек патнех илсе çитерет. Çул-йĕр хăрушсăрлăхĕн патшалăх инспекцийĕ çакăн çинчен пĕлтерет: çул-йĕр правилисемпе (ПДД) килĕшỹллĕн, мопеда 16 çул тултарнă, автошкулта вĕреннĕ, патшалăх инспекцийĕнче "М" категориллĕ удостоверени илнĕ каччăпа хĕр кăна тытса пыма пултарать. Практика çакна кăтартать: аслисем нумай чухне кăна шута илмеççĕ, транспорт хатĕрне туянса параççĕ, тĕрĕслесе тăмаççĕ. Тивĕçлĕ удостоверенисĕр çул çитмен çамрăка мопед рулĕ умне ларсан, вăл 16 çул тултарсан административлă явап тыттараççĕ — 5-15 пин тенкĕ таран штраф хураççĕ, транспорт хатĕрне туртса илсе ятарлă вырăна лартаççĕ. 16 çул тултарманнисемшĕн ашшĕ-амăшĕ явап тытать. Çавăнпа та çуллахи тапхăрта, канмалли кунсемпе уявсенче вĕсем çине тата та пысăкрах яваплăх ỹкет.