22 мая 2020 г.
Район администрацийĕн пуçлăхĕ А. Кузнецов район тăрăх ĕçлĕ çул çỹревре пулнă. Чи малтанах вăл "Композит21" ОООна çитсе курнă. Общество директорĕпе Г. Афанасьевпа умри тĕллевсем пирки канашланă. Кунта хатĕр продукцин складĕнчен тĕп автомобиль трассине тухиччен хытă сийлĕ çул хывнă, халĕ ун хĕррипе йывăç лартас ĕç пырать. Еншик Чуллă ял тăрăхне кĕрекен Пĕрремĕш Çĕньял старости Н. Филиппов тĕрлĕ шайри канашлусенче ялта вак чул сарса çул тăвас ыйтăва çĕкленĕ, ку ыйтупа район ертỹçи патĕнче йышăнура та пĕрре кăна мар пулнă. Александр Николаевич Пĕрремĕш Çĕньялта пулнă, ял çыннисемпе канашланă, вырăнти лару-тăрупа тĕплĕн паллашнă. Çывăх вăхăтра кунта строительство ĕçĕсем пуçăнмалла. Çавăн пекех район ертỹлĕхĕ Санькасси ялне çитсе килнĕ. Çул-йĕр тăвас ыйтăва та кунта çывăх вăхăтра татса парĕç. Ун хыççăн А. Кузнецов Упи ял тăрăхĕн пуçлăхĕпе Н. Димитриевăпа, район депутачĕсен Пухăвĕн депутачĕпе Б. Клементьевпа Янмурçин ялĕнче пулса ку ялти пĕвене çирĕплетес ыйтăва тишкернĕ, Мăн Çавал çинчи ял халăх вăйĕпе çĕклесе лартнă кĕпер шăпипе интересленнĕ. Паянхи кун райцентрта обществăлла территорисене, чарăну вырăнĕсене, парксемпе аллейăсене коронавирус инфекцийĕнчен дезинфекцилес, райцентрти Ленин урамĕнчи 20-мĕш çурт картишне тирпей-илем кĕртес, çуран çỹрекенсене хăрушсăрлăхпа тивĕçтерес, çынсем автоçул урлă палăртман вырăнтан каçассине чарас тĕлĕшпе тимĕр картасемпе пỹлес ĕç пырать.