15 мая 2020 г.
(Малалли. Пуçламăшĕ 25, 26, 28, 29, 30, 31-мĕш номерсенче).
1945 çулхи февралĕн 15-мĕшĕ тĕлне стрелок пулма 71, апрелĕн 15-мĕшĕ тĕлне 195 çынна вĕрентнĕ тесе Шупашкара республикăри çар комиссариатне пĕлтернĕ. 1945 çулхи июнь уйăхĕн 10-мĕшĕ тĕлне 4 вăтам шкулта 43 хĕр радиотелеграфист пулма, 9-ĕ телефонпа ĕçлеме вĕреннĕ, сандружина членĕ пулма 70 хĕр — пĕтĕмпе 122 çамрăк хĕре вĕрентнĕ. Тулли мар вăтам шкулсенче вара пурĕ 453 хĕр ачана сандружинница пулма пĕлỹ панă. 1945 çулта Красноармейски вăтам шкулĕнче çар ĕçне Кĕçĕн Чуллă ялĕнче 1916 çулта çуралнă Александр Сергеевич Сергеев вĕрентнĕ. Çапăçусене 1941 çулхи июнĕн 22-мĕшĕнчен пуçласа 1944 çулхи сентябрь уйăхĕн 24-мĕш кунĕ таран хутшăннă. Унăн “лейтенант” званине 22-мĕш çар армийĕн командующийĕн 0630 №-лĕ приказĕпе 1942 çулхи сентябрь уйăхĕн 15-мĕшĕнче çирĕплетнĕ. Упири çар вĕрентĕвне Ванюшкассинче 1923 çулта çуралнă Андрей Николаевич Николаев техник-лейтенант йĕркелесе пынă. Вăл Ленинградри артиллери çар училищине вĕренсе пĕтернĕ, фронтри юнлă та хаяр çапăçусене 1943 çулхи июнь уйăхĕнчен пуçласа 1944 çулхи декабрĕн 13-мĕшĕ таран хутшăннă, 3-мĕш ушкăнри вăрçă инваличĕ. 1945 çулхи декабрĕн 12-мĕшĕнче районти çар комиссарĕ А.М. Егоров капитан, А.Н. Николаев военрук занятисене тĕплĕн хатĕрленсе кашни урока план тăрăх ирттернине районти çар вĕрентĕвне йĕркелекенсен канашлăвĕнче палăртнă. Çав çулах, декабрĕн 24-мĕшĕнче районти çар комиссарĕ пулса Дроботов майор службăра тăни паллă. Çавăн пекех çар комиссариатĕнче А.М. Михайлов, А.В. Киселев, М.С. Осипов, А.Т. Лепков, А.Д. Коловеров, Ф.Т. Белугин офицерсем пулнине вăрттăнлăхлă фондăн 15-мĕш папкăн 101 страницинче пĕлме май пулчĕ. Çакна та палăртса хăвармалла: çар ĕçĕн инструкторĕ — М.С. Мальковский кĕçĕн лейтенант Атăлçи çар округĕн штабне тухса кайнă.
В. Серафимов,
Чăваш наци ăс-хакăлпа ỹнер академийĕн членĕ
(Малалли пулать).