Публикации » “Таябинка” Агрофирма” ОООра çĕр улми лартаççĕ

15 мая 2020 г.

 Агропромышленность комплексĕн организацийĕсемшĕн ака вăхăчĕ — çăмăл мар, яваплă тапхăр. Ку вăхăтри ĕçсене вăхăтра тата пахалăхлă пурнăçланинчен пулас тухăç кăна мар, çитес çулхи ăнăçлăх та килет. Ахальтен каламаççĕ вĕт: çуркунне çулталăк тăрантарать. Район администрацийĕн пуçлăхĕ А. Кузнецов тата АПК организацийĕсемпе çыхăну тытакан сектор заведующийĕ Н. Арсентьева Трак енре çурхи уй-хир ĕçĕсем мĕнле пынипе паллашнă май “Таябинка” Агрофирма” ОООра пулса курнă. Обществăра хĕрсех “иккĕмĕш çăкăр” лартаççĕ. Кăçал кунта вăл 200 гектар лаптăк йышăнмалла. Çакăн валли вăрлăх çителĕклĕ. Нумаях пулмасть тата 60 тонна суперэлита вăрлăх туяннă. Ю. Шуряшкин, Э. Федоров механизаторсем çĕр хатĕрлеççĕ. Р. Самсоновпа В. Владимиров вăрлăх турттараççĕ. ЧР тава тивĕçлĕ механизаторĕ О. Васильев John Deere тракторпа Grimmi çĕр улми лартмалли агрегатпа çак ĕçе пурнăçлать. Пĕр харăсах хирте 10 единица техника ĕçлет.