08 мая 2020 г.
Аслă вăрçă кĕрлесе чарăннă ĕнтĕ. Мускав хули варрине салтак форми тăхăннă ача хурлăхлăн утнă. Пĕчĕк кăкăрĕнче 2 медаль çуталса курăннă унăн. Çамрăк салтак куçĕнчен чарăнайми куççулĕ юхнă. — Ăçта çул тытать кĕçĕн сержант? — интересленет тĕл пулнă генерал. Вăрçăри служба йĕркисене хăнăхнă ача самантрах пуçтарăнса аслă офицера чыс парать. 14 çулхи Гена Вечеренко, çапла чĕннĕ çамрăк салтака, вăрçа Прагăра кĕçĕн сержант званипе вĕçлет. Фронтовика Мускаври Суворовски училищăна вĕренме яраççĕ. Анчах, ача сăмахĕ тăрăх, штаб полковникĕ ăна вĕренме илмен: вĕренỹ çулĕ пуçланнă, вырăн та çук, имĕш. Генерал, каярахпа пĕлнĕ тăрăх паллă çар дипломачĕ Игнатьев, çамрăк салтака комсомолăн хулари комитетне пĕрле пыма сĕнет. Кунта ăна ĕç училищи тупса вĕренме май параççĕ. Çулсем иртсен Геннадий Андреевич Вечеренко фотокорреспондент пулса ĕçлет, Журналистсен союзĕн преми лауреачĕ пулать. Ача чухнехи вăрçă çулĕсем çинчен “Тихим голосом памяти” ятлă кĕнеке çырать. Ун хуплашкине çỹлерех кăтартнă сăн ỹкерчĕке усă курса илемлетнĕ. Ăнланатăр ĕнтĕ, сăн ỹкерчĕкри иккĕмĕш ретре полк ывăлĕ Гена Вечеренко тăрать. Унпа юнашар тăраканни чăваш каччи Павел Семенов. — Вăл манăн атте, — каласа парать Трак салинче пурăнакан Эмилия Павловна Семенова, — полк ывăлне Генăна пĕрмаях асăнатчĕ хаклă çыннăм. Ăна вăл шыраса тупас шутлăччĕ. Анчах ĕлкĕреймерĕ, атте хамăр хушăра çук ĕнтĕ. Халĕ, интернет ĕмĕрĕнче, атте ĕмĕтне кăшт пурнăçларăмăр. Малашне те çак историне уçăмлăрах палăртасшăн”.
В. Усли.