24 апреля 2020 г.
Анна Алексеевна Алексеева Мăн Шетмĕ ял тăрăхĕнчи Дворики ялĕнче кун çути курнă. 1937 çулта, шкулта 7 класс вĕçлесен, ялта культура ĕçченĕнче тăрăшнă. 1938 çулта Çĕрпỹри профтехучилищĕне вĕренме кĕнĕ. 1942 çулта хăй ирĕкĕпе фронта тухса кайнă. Истребительсен авиаполкĕнче, стрелок-оружейник пулса çапăçнă. Пулас мăшăрне — Чатукассинче çуралса ỹснĕ В.Ф. Федотов çар фельдшерне — вăрçă хыççăн тĕл пулнă. Вĕсем 6 ача çуратса ура çине тăратнă. Вăтам ывăлĕ — Вениамин, Хусанти авиаци институтĕнчен вĕренсе тухнă, çар инженерĕ, майор, Камчаткăра хĕсметре тăнă. А.А. Алексеевăна Тăван çĕршыв вăрçин I степеньлĕ орденĕпе, “Тăван çĕршывăн 1941—1945 çç. Аслă вăрçинче Германие çĕнтернĕшĕн”, “Японие çĕнтернĕшĕн” медальсемпе, “Отличник ПВО” паллăпа тата ытти нумай юбилей медалĕсемпе чысланă. Çар званийĕ — кĕçĕн сержант.