21 апреля 2020 г.
Тĕнчене çавăрса илнĕ çĕнĕ инфекци этеме шỹтлеменнине, шел те, халĕ те пурте ăнланса илеймен-ха. Коронавирус хăрушлăхĕ пирки влаç та, массăллă информаци хатĕрĕсем те пĕлтерсе, асăрхаттарса тăраççĕ пулин те, çынсем сывлăхне упрасси пирки питех те пăшăрханмаççĕ пулас. Вирус шелсĕрри вара кунран-кун çирĕпленсе пырать. Урамалла тухса утиччен "уçăлса çỹрени е пỹлĕмре ларни тĕрĕсрех пулĕ-ши" тесе шухăшласа илсен аванччĕ. Йывăр тапхăрта пĕр-пĕрне пулăшни питĕ пĕлтерĕшлĕ, ватă çынсемпе чирлисене уйрăмах тимлĕх кирлĕ. Пĕрисем хỹтĕлев маскисем валеçеççĕ, теприсем тухтăрсене апат-çимĕçпе тỹлевсĕр тивĕçтереççĕ, виççĕмĕшĕсем аслă ỹсĕмрисем валли куллен кирлĕ таварсене киле çитерсе параççĕ. Пархатарлă ĕçе ырă чунлă çынсем хутшăнаççĕ. Ку вăхăтра волонтерсен ĕçĕ уйрăмах курăмлă. Хальхи вăхăтра республикăри хуласемпе районсенче волонтерсен штабĕсем уçнă, вĕсен ĕçне 500 яхăн çынна явăçтарнă. Йывăр вăхăтра çынсене пулăшас тĕллевпе Раççейре "Эпир пĕрле" проект пуçарнă. Пирĕн регионти штаб çак тапхăрта 600 ытла çынна пулăшнă. Чăваш Енри бокс федерацийĕ те ятарлă штаб туса хунă. Ку ĕçе 10 ытла спортсменпа тренера явăçтарнă. Вĕсем спорт ветеранĕсене ытларах пулăшу кỹреççĕ. Ку евĕр тĕслĕхсене татах та асăнма пулать. Коронавируспа чирлисен шутне кăтартакан цифрăсем сехетпе мар, минутпа улшăнса тăраççĕ тейĕн. Ĕнерхи кун тĕлне тĕнчере вирус пуррине 2388848 çынăнне тупса палăртнă, 615459 сывалнă, хаяр чир 164376 çынăнне пурнăçне татнă. АПШра çак амакпа 755162 çын чирлине тупса палăртнă, 68822 сывалнă, 40109 пурнăçран уйрăлнă. Испанире ку кăтартусем çакăн пек: 195944, 77357 тата 20639. Италире 178972 çын çак чирпе асапланать, 47055 сывалнă, 23660 вилнĕ. Раççейре вирус инфекцийĕ ернĕ 42983 çынна тупса палăртнă, 3303 сывалса тухнă, 363 пурнăçран уйрăлнă. ; ; ; Чăваш Енре чирлисен шучĕ 193 çынна çитнĕ, 9 сывалнă, 1 çын вилнĕ. ЧР Сывлăх сыхлавĕн министерстви пĕлтернĕ тăрăх, республикăра чирлисен 40 проценчĕ Мускавран, пĕр çын Бразилирен, иккĕн Доминикан Республикинчен вирус ертсе килнĕ. Ыттисем _ çав çынсемпе хутшăннисем. Ку кăтарту Чулхула облаçĕнче çакăн пек: 646, 26 тата 4. Мари Эл Республикинче 262 çын асăннă вируспа чирлет, 24 сывалнă, 1 çын вилнĕ. Тутарстанра 191 çынна çак амак ернĕ, 25 сиплев учрежденийĕсенчен сывалса тухнă, вилнисем çук.