17 апреля 2020 г.
Кăçалхи кăрлач уйăхĕнче Правительствăн зоопарксене, зоосадсене, цирксене, зоотеатрсене, дельфинарисене, океанариумсене лицензилесси пирки калакан постановленийĕ вăя кĕчĕ. Документа Раççей Ял хуçалăх министерстви хатĕрленĕ. Чĕр чунсене культура-курав тĕллевĕпе усă куракан учрежденисене Россельхознадзор лицензи парĕ. Предпринимательсен тата юридици сăпатĕнчи çынсен документсене 2022 çулхи кăрлач уйăхĕн 1-мĕшĕччен хатĕрлемелле, унсăрăн вĕсен хупăнма тивет. Лицензи илес текенсен ятарлă çурт-вырăн, сооружени, вĕсен çумне çирĕплетнĕ территори тата ятарлă техника, çавăн пекех ку енпе пĕлỹ илнĕ тата темиçе çул тăрăшакан çынсем пулмалла. Кунпа кăна хушусен списокĕ вĕçленмест-ха. Зоопарксен, цирксен тата дельфинарисен хуçисен чĕр чунсемпе мĕнле пулмалли çинчен пĕлтерекен федераци саккунĕсене, ветеринари нормисене тата йĕркисене, çавăн пекех Правительствăн чĕр чунсене культурăпа кану-киленỹ тĕллевĕсемпе усă курасси çинчен калакан постановление çирĕп пăхăнмалла. Документа хăрушсăрлăх требованийĕсене кĕртнĕ. Читлĕх (вольер) картисене чĕр чунсем унтан тухмалла мар янтăламалла. Сăмахран, вольертан ирĕккĕн тухма чаракан “электрокĕтỹç” хатĕрпе. Представление куракансене явăçтарма та ирĕк çук. Чĕр чунсен хăрушсăрлăхĕ пирки те каланă унта. Вĕсем пурăнакан вырăнсенче шĕвĕр кĕтессем, тутăхнă вырăнсем пулмалла мар, электророзеткăсене сиен кỹмелле мар вырнаçтармалла. Сăмахран, циркри слон читлĕхĕ 7х7х4,5 метртан кая мар пулмалла. Слона кашни кун тасатмалла, кунне икĕ хут вĕсен куçĕсене вĕретнĕ шывпа тата çемçе татăкпа çумалла, урисене тăварлă шывра тытмалла. Каламалла, зоопаркри слон валли самай пысăкрах вырăн кирлĕ. Кашни чĕр чун тĕлĕш-пе — уйрăм норма. Хушусенче вольерсен виçи пирки кăна мар, температура режимĕ, нỹрĕклĕх шайĕ пирки те каланă тата ыт. те. Н. Васильева