Публикации » Çулталăк вĕçлениччен çутă сỹнтермĕç

14 апреля 2020 г.

 Чăваш энергосбыт компанийĕ те коронавируспа кĕрешес ĕçе курăмлă тỹпе хывать. Энергетиксем çăмăл мар çак тапхăрта потребительсене пулăшмалли йышăну тунă. Çĕршыври эпидеми лару-тăрăвне шута илсе халăха пулăшас тĕллевпе Чăваш энергосбыт компанийĕ коронавирус инфекцийĕпе кĕрешнĕ чухнехи тапхăрта 2021 çулхи кăрлачăн 1-мĕшĕччен потребительсен мĕн пур категорийĕ тĕлĕшпе электроэнергишĕн тỹлемелли парăмсемшĕн штраф санкцийĕсем — пенясем — шутласа палăртмĕ. Çавăн пекех çулталăк вĕçлениччен республикăра пурăнакан парăмлă çынсене электроэнерги парса тăрассине те чармĕ. — Хăшĕ-пĕри çак лару-тăрăва коммуналлă пулăшу ĕçĕсемшĕн тỹлемесĕр пурăнмалли сăлтав вырăнне те хума пултарĕ, — тенĕ Чăваш энергосбыт компанийĕн ĕç тăвакан директорĕ Александр Гончаров. — Мĕн пур потребителе яваплă пулма, электроэнергишĕн вăхăтра тỹлеме чĕнсе калатпăр. Шута илмелле: пĕтĕм тапхăршăн капланакан парăмсем пăрахăçланмаççĕ, пысăклансах пынă май кайран вĕсене татасси пушшех те йывăр пулĕ.