31 марта 2020 г.
Чăваш Республикин Пуçлăхĕн тивĕçĕсене вăхăтлăх пурнăçлакан О. Николаев çак кунсенче Указ çине алă пуснă. Унпа килĕшỹллĕн пуш уйăхĕн 28-мĕшĕнчен пуçласа уйрăм йышăну кăлариччен республика территорийĕнче каçхи клубсем, дискотекăсем, ку евĕр ытти объектсем, кинотеатрсем, кружоксем, секцисем, ачасен вăйă пỹлĕмĕсем, ача-пăчан йăпатмăш центрĕсем, ытти кану учрежденийĕсем хăйсен ĕçне чарса лартаççĕ. Вăхăтлăха спортзалсене, фитнес-центрсене, бассейнсене, физкультурăпа спортăн ытти объекчĕсене хупаççĕ. Пуш уйăхĕн 28 — ака уйăхĕн 5-мĕшĕсенче ресторансемпе кафесем, столовăйсемпе буфетсем, барсем, закусочнăйсем, обществăлла апатланăвăн ытти предприятийĕсем, дистанциллĕ суту-илỹсĕр пуçне, ĕçлемеççĕ. Çак хушăра илемлĕх салонĕсем, парикмахерскисем, косметика салонĕсем, мунчапа саунăсем çынсене çăмăллăхсем памĕç. Кунсăр пуçне мартăн 28-мĕшĕнчен пуçласа июнĕн 1-мĕшĕччен тĕрлĕ шайри курортсен массăллă кану объекчĕсем хăйсен ĕçне чарса лартаççĕ.