Публикации » Çуркуннене кĕтсе илчĕç

13 марта 2020 г.

Çак кунсенче Пикшик ял тăрăхне кĕрекен Çĕньял Шетмĕсем хĕллене ăсатса çуркуннене кĕтсе илчĕç тата Çăварнине уявларĕç. Н. Егорова килĕ умĕнчи лапамра “Хĕр кỹлепине” капăрлатнă, тавралла тĕрлĕрен пуканесем вырнаçтарнă. Юнашар çимĕçсемпе тулли уяв сĕтелĕ, варринче — пăсланакан сăмавар. А. Ильина халăха çăварни икерчипе, Н. Егорова пылак чейпе хăналарĕ. “Шыв хĕрринче ỹсет çĕмĕрт йывăç Улма йывăç тавра çаврăнса. Шăпăр-шăпăр çăвать çурхи çумăр Йывăç турат тăрăх тăкăнса”, — юрăри пĕр куплетне 76 çул çине ярса пуснă Любовь Максимова шăрантарса савăнтарчĕ. Тепĕр кана ял вĕçĕнчи тăвайккирен ватрушка, сывлăшпа карăнтарнă резина матрас çине ларса ярăнчĕç. Савăнăçлă сасăсем вăрахчен чăваш ялĕ çийĕн илтĕнчĕç. Пулса иртекен уявсенче ялти халăха явăçтарса ертсе пыма май тата вăхăт тупнăшăн Алевтинăпа Вечеслав Ильинсене тав сăмахĕ, вăрăм кун-çул сунасшăн.

Л. Соловьев.