Публикации » Судра ĕçлекенсем ăмăртнă

21 февраля 2020 г.

Нарăс уйăхĕн 15-мĕшĕнче Лапсар поселокĕнче судра ĕçлекенсем хушшинче йĕлтĕрпе чупассипе ăмăрту иртрĕ. Унта пирĕн районтан пиллĕкĕн хутшăнчĕç. Пуринчен те ăнăçлăрах судьяна пулăшакан Надежда Антипова ăмăртнă. Вăл 2-мĕш вырăн йышăннă. Н. Антипова хăйĕн пултарулăхне пула Аслă суд команди йышне кĕме тивĕç пулнă. Унта ăна пĕрремĕш этапра чупма шаннă. Ку тапхăрта вăл пĕрремĕш çитнĕ. Çапла вара Аслă суд команди эстафетăлла ăмăртура çĕнтерỹçĕ пулса тăнă. Çакна каласа хăвармалла: суд ĕçченĕсен хушшинче çак евĕр ăмăртусем кашни çулах иртеççĕ. Унта Н. Антипова та активлă хутшăнать. Тĕслĕхрен, пĕлтĕрхи ăмăртура вăл пĕрремĕш вырăн йышăннă. Малалла та ăна ăнăçусем сунатпăр.

А. Сидоров.