22 ноября 2019 г.
Амăшĕсен кунне пирĕн тăрăхра çулленех паллă тăваççĕ, концертсем кăтартаççĕ, амăшĕсемпе тĕл пулусем йĕркелеççĕ, саламлаççĕ. Нумаях пулмасть центрти ача-пăча сачĕсенче аннесене халалланă уяв иртрĕ. “Сеспель” ача садне çỹрекенсем (ертỹçи — Э.Григорьева) амăшĕсене мĕнлерех юратнине хăйсен пултарулăхĕ урлă кăтартрĕç: сăвăсем каларĕç, илемлĕ юрăсем шăрантарчĕç, ташă лартса савăнтарчĕç, парнесем пачĕç. Амăшĕсем, асламăшĕсемпе кукамăшĕсем хăйсен тĕпренчĕкĕсене ăшшăн пăхса ларчĕç, савăк та тулли кăмăлпа уявран тухрĕç. “Çеçпĕл” ача сачĕн ертỹçи Л. Яковлева, ашшĕ-амăшĕн комитечĕ воспитательсене саламларĕ, тав сăмахĕ каларĕç, малашне те ĕçре ыррине сунчĕç.
Н. Филиппова.